مسجد الحرام مکہ مکرمہ میں منعقدہ 45 ویں کنگ عبدالعزیز بین الاقوامی مقابلہ حسن قرات، حفظ قرآن کے کئی شرکا کا کہنا ہے فائنل راونڈ تک پہنچنا ان کے لیے فخر اور بڑے اعزاز کا باعث ہے۔
ایس پی اے کے مطابق انہوں نے بین الاقوامی ججز اور جدید الیکٹرانک ججنگ سسٹم کو سراہتے ہوئے وزارت اسلامی امور کا شکریہ ادا کیا۔
کینیڈا سے تعلق رکھنے والے محمد الحسن نے الیکٹرانک ججنگ سسٹم کی تعریف کی۔ وزارت اسلامی امور کے انتظامات اور کوششوں پر شکریہ ادا کیا۔
گنی بساؤ سے تعلق رکھنے والے محمد جاوا نے کہا کہ ’ اپنی زندگی کے سب سے خوبصورت لمحات مسجد الحرام کے قریب اور دنیا بھر سے آئے ہوئے ساتھی شرکا کے ہمراہ گزار رہا ہوں‘۔
انہوں نے کہا کہ ’اس مرحلے تک پہنچنا اعزاز کی بات ہے خصوصا جب یہ مقابلہ کنگ عبدالعزیز سے منسوب ہے اور خادم حرمین شریفین کی سرپرستی میں منعقد ہورہا ہے۔
بوسنیا ہرزیگووینا کے عبدالرحمن عبدالمنعم نے وزارت اسلامی امور کی فراہم کردہ خدمات کو سراہا اور الیکٹرانک ججنگ سسٹم کو قابل تحسین اقدام قرار دیا۔
واضح رہے وزارت اسلامی امور کی جانب سے یہ مقابلہ خادم حرمین شریفین شاہ سلمان کی سرپرستی میں ہورہا ہے۔ اس مقابلے میں 128 ممالک کے 179 شرکا شریک ہیں۔
