ندین ایوب پہلی مرتبہ مقابلہ حسن ’مس یونیورس‘ میں فلسطین کی نمائندگی کریں گی

معروف ماڈل ندین ایوب نے اعلان کیا ہے کہ وہ مشہور مقابلہ حسن ’مس یونیورس‘ میں فلسطین کی نمائندگی کریں گی۔

مقابلہ حسن ’مس یونیورس‘ کا 74 واں ایڈیشن رواں برس نوممر میں تھائی لینڈ کے شہر پاک کریٹ میں منعقد ہو گا۔

یہ ایسا پہلا موقع ہو گا جب فلسطین کی جانب سے باقاعدہ کوئی ماڈل ’مس یونیورس‘ میں شرکت کرے گی۔

سوشل میڈیا پلیٹ فارم انسٹاگرام پر پوسٹ کرتے ہوئے ندین ایوب نے لکھا کہ ’آج میں مس یونیورس کے سٹیج پر صرف ایک اعزاز کے ساتھ نہیں بلکہ ایک سچائی کے ساتھ قدم رکھ رہی ہوں۔ جب فلسطین، خاص طور پر غزہ دکھ اور صدمے سے گزر رہا ہے، میں ایک ایسی قوم کی آواز بن کر آئی ہوں جو چُپ ہونے سے انکار کرتی ہے۔‘

وہ مزید لکھتی ہیں کہ ’میں ہر فلسطینی عورت اور بچے کی نمائندگی کر رہی ہوں جن کی طاقت دنیا کو دیکھنے کی ضرورت ہے۔ ہم صرف اپنے دکھ نہیں ہیں، ہم استقامت، امید اور ایک ایسے وطن کی دھڑکن ہیں جو ہم میں زندہ ہے۔‘

ندین ایوب ان دنوں دبئی میں مقیم ہیں اور وہ ایک فٹنس کوچ اور ماہر غذائیات کے طور پر جانی جاتی ہیں۔ انہوں نے سنہ 2022 میں منیلا میں ہونے والے ’مس ارتھ‘ مقابلے میں مس ارتھ واٹر کا اعزاز اپنے نام کیا تھا۔

انہوں نے اس مقابلے میں بھی پہلی فلسطینی خاتون کی حیثیت سے شرکت کی تھی۔

یاد رہے کہ مس ارتھ کو دنیا کے چار بڑے بین الاقوامی حسن کے مقابلوں میں شمار کیا جاتا ہے جن میں مس ورلڈ، مس یونیورس اور مس انٹرنیشنل شامل ہیں۔

ندین ایوب کو سنہ 2022 میں مس فلسطین کا تاج پہنایا گیا تھا۔ وہ ’اولیو گرین اکیڈمی‘ کی بانی ہیں جو ایک ایسا تعلیمی ادارہ ہے جو پائیداری کو مصنوعی ذہانت کے ساتھ جوڑ کر مواد تخلیق کرنے کی تربیت فراہم کرتا ہے۔