اسرائیل عزہ میں فلسطنیوں کی ’نسل کشی‘ کر رہا ہے: سعودی عرب

سعودی عرب نے غزہ میں اسرائیل کے اقدامات کو ’نسل کشی‘ قرار دیا ہے۔

سعودی وزارت خارجہ نے جمعرات کو سوشل میڈیا پلیٹ فارم ایکس پر جاری بیان میں کہا کہ’مملکت، فلسطینی عوام اور ان کی مقبوضہ زمین کے خلاف اسرائیلی قابض حکام کی جانب سے مسلسل جرائم کے ارتکاب کی شدید ترین الفاظ میں مذمت کرتی ہے۔‘

بیان میں مزید کہا گیا کہ اسرائیل فلسطینیوں کو ان کی زمین سے ’جبراً بے دخل‘ کر رہا ہے اور انہیں ایک آزاد ریاست کے قیام سے روک رہا ہے۔

سعودی پریس ایجنسی کے مطابق سعودی عرب نے  کہا ہے کہ ’اسرائیلی قابض افواج کی طرف سے فلسطینی عوام کو بے دخل کرنے کی کوشش مسترد کرتے ہیں‘۔

’مقبوضہ بیت المقدس کے اطراف میں بستیوں کی تعمیر اور غزہ کی پٹی میں نہتے شہریوں کے خلاف نسل کشی جنگی جرم ہے‘۔

سعودی عرب نے اس بات پر زور دیا کہ یہ اقدامات بین الاقوامی قانون اور سلامتی کونسل کی قراردادوں کی سنگین خلاف ورزی ہیں۔

 اسرائیلی خطرناک منصوبوں پر عمل درآمد اور قابض حکام و افواج کے جرائم کا بلا روک ٹوک تسلسل خطے کے امن و استحکام پر گہرے اثرات مرتب کرتا ہے اور بین الاقوامی نظام کی قانونی حیثیت کو خطرے میں ڈالتا ہے۔