پاکستان انڈیا میچ، ’گڑبڑ‘ کرنے والے تماشائیوں کو بھاری جُرمانہ اور سزا ہوگی: دبئی پولیس

ٹی20 ایشیا کپ میں اتوار کو پاکستان اور انڈیا مدمقابل ہیں، اور یہ بڑا ٹاکرا دبئی انٹرنیشنل کرکٹ سٹیڈیم میں منعقد ہو گا۔

تاہم گلف نیوز کے مطابق دبئی ایونٹس سکیورٹی کمیٹی (ای ایس سی) نے دونوں ملکوں کے شائقین پر زور دیا ہے کہ وہ میچ کے دوران سپورٹس مین سپرٹ کا مظاہرہ کریں اور سٹیڈیم کے قوائد و ضوابط کی پابندی کریں۔

دبئی پولیس کے اسسٹنٹ کمانڈر ان چیف فار آپریشنز اور ای ایس سی کے چیئرمین میجر جنرل سيف مهير المزروعی نے تصدیق کی ہے کہ پولیس کے خصوصی یونٹس ایشیا کپ 2025 کے تمام میچز کی سکیورٹی کے لیے مکمل طور پر تیار ہیں۔

انہوں نے خبردار کیا کہ حفاظتی اقدامات میں کسی بھی طرح کی رکاوٹ پر سخت کارروائی کی جائے گی اور شائقین اور املاک کے تحفظ کے لیے قانونی کارروائی بھی کی جائے گی۔

وفاقی قانون برائے کھیلوں کی املاک اور سٹیڈیمز کی سکیورٹی کے حوالے وفاقی قانون کا حوالہ دیتے ہوئے، سيف مهير المزروعی نے بتایا کہ قوانین کی خلاف ورزی کرنے والوں کے خلاف سخت کارروائی کی جاتی ہے۔

’اگر کوئی شخص بغیر اجازت کے گراؤنڈ میں داخل ہو جائے یا آتش بازی جیسی ممنوعہ اشیا لے کر آئے، تو اسے ایک سے تین ماہ تک قید اور پانچ ہزار سے 30 ہزار درہم تک جرمانے کا سامنا کرنا پڑ سکتا ہے۔‘

انہوں نے کہا کہ ’اسی طرح تشدد، چیزیں پھینکنے، نسلی تعصب یا توہین آمیز زبان کے استعمال جیسے اقدامات پر بھی قید اور 10 ہزار سے 30 ہزار درہم تک جرمانہ عائد کیا جا سکتا ہے۔‘

دبئی پولیس کے اسسٹنٹ کمانڈر ان چیف فار آپریشنز کے مطابق ممنوعہ چیزوں اشیا میں آتش بازی کا سامان، آتش گیر مادہ، لیزر، چھتری۔ بڑے کیمرے، سیلفی سٹکس، تیز دھار والے آلات، زہریلا مواد، جھنڈے، بینرز، پالتو جانور، ریمورٹ کنٹرولڈ ڈیوائسز، سائیکلیں، سکوٹرز، سکیٹ بورڈز اور کانچ کی اشیا شامل ہیں۔

خیال رہے کہ پاکستان اور انڈیا کے مابین میچ کا آغاز شام ساڑھے سات بجے ہوگا جبکہ ٹاس سات بجے شیڈول ہیں۔

انڈیا اور پاکستان کے درمیان رواں برس مئی میں ہونے والی فوجی کشیدگی کے بعد دونوں ٹیمیں پہلی مرتبہ ایک دوسرے کا سامنا کریں گی۔

انڈیا حالیہ ٹی20 کرکٹ چیمپئن ہے جبکہ پاکستان نے آخری پانچ ٹی20 سیریز میں سے تین سیریز جیت رکھی ہیں۔