اپنی شرط پر زندگی، بالی وڈ کے وہ ستارے جنہوں نے شادی کو کبھی ترجیح نہیں دی

بالی وڈ سے تعلق رکھنے والی شخصیات اکثر اپنی فلمی اور ذاتی زندگی کے حوالے سے خبروں کی زینت بنی رہتی ہیں۔

ویب سائٹ ’کوئی موئی‘ کے مطابق جہاں کئی فلمی ستارے شادی کے بعد گھر بسا چکے ہیں اور خوش حال زندگی گزار رہے ہیں وہیں کچھ ایسے نام بھی ہیں جنہوں نے شادی نہ کرنے کا فیصلہ کیا اور اپنی آزادانہ اور کامیاب زندگی کو تنہا جینے کو ہی ترجیح دی۔

یہاں ہم کچھ ایسے بالی وُڈ ستاروں کے بارے میں بتاتے ہیں جو بغیر شادی کیے خوش حال زندگی گزار رہے ہیں۔

سشمیتا سین

سابق مس یونیورس اور اداکارہ سشمیتا سین اپنی ذاتی زندگی کے باعث اکثر خبروں میں رہتی ہیں۔

وہ ماڈل رومان شال کے ساتھ تعلق میں رہیں لیکن دسمبر 2021 میں دونوں کی راہیں جدا ہو گئیں۔

بعد ازاں ان کا نام کاروباری شخصیت للیت مودی کے ساتھ بھی جوڑا گیا مگر یہ رشتہ زیادہ عرصہ نہ چل سکا۔

سشمیتا سین اپنی شرائط پر زندگی گزارنا پسند کرتی ہیں اور گود لی ہوئی دو بیٹیوں رینی سین اور علیشہ سین کی ماں ہیں۔

سلمان خان

بالی وڈ کے سپرسٹار سلمان خان کو آج بھی انڈسٹری کا سب سے بڑا غیرشادی شدہ اداکار کہا جاتا ہے۔

ان کی ذاتی زندگی ہمیشہ موضوعِ بحث رہی ہے۔

سلمان خان کے کترینہ کیف، ایشوریہ رائے اور سنگیتا بجلانی جیسی معروف اداکاراؤں کے ساتھ دوستی کی خبروں کا چرچا رہا ہے۔

ایک انٹرویو میں سلمان خان نے کہا تھا کہ انہیں محبت پر یقین نہیں اور شادی وقت اور پیسے کا ضیاع ہے۔

امیشا پٹیل

امیشا پٹیل بالی وڈ کا جانا پہچانا نام ہیں۔ 50 برس کی عمر میں وہ اب تک غیرشادی شدہ ہیں اور خوش گوار زندگی گزار رہی ہیں۔

امیشا پٹیل نے سنہ 2000 میں فلم  ’کہو نا پیار ہے‘ سے اپنے فلمی سفر کا آغاز کیا تھا۔

وہ آج بھی اپنے خودمختار اور آزادانہ طرزِ زندگی کو ترجیح دیتی ہیں اور اپنی شرائط پر زندگی گزار رہی ہیں۔

تبو

تبو کا شمار بالی وڈ کی باصلاحیت اداکاراؤں میں ہوتا ہے۔

ان کا اصل نام تبسم فاطمہ ہاشمی ہے لیکن انہوں نے آسانی کے لیے ’تبو‘ کو سٹیج نام بنایا۔

53 برس کی عمر میں بھی تبو غیرشادی شدہ ہیں اور اپنی توجہ مکمل طور پر کام پر مرکوز رکھتی ہیں۔

ماضی میں ان کا نام اداکار سنجے کپور، پروڈیوسر ساجد ناڈیاڈوالا اور اداکار اجے دیوگن کے ساتھ جوڑا جاتا رہا ہے۔

ایکتا کپور

مشہور ٹی وی پروڈیوسر ایکتا کپور بھی 50 برس کی عمر میں غیر شادی شدہ ہیں۔ ان کا کہنا ہے کہ شادی میں ان کی دلچسپی نہیں کیونکہ ان کے زیادہ تر دوست شادی کے بعد دوبارہ سنگل ہو گئے۔

ایک انٹرویو میں انہوں نے کہا تھا کہ انہیں اپنے لیے وقت نہیں ملتا، اگر کبھی کچھ وقت ملے تو وہ دوستوں کے ساتھ چھٹی گزارنا یا آرام کرنا پسند کرتی ہیں۔

وہ سنہ 2019 میں ’سروگیسی‘ کے ذریعے بیٹے راوی کپور کی ماں بنی تھیں۔

کرن جوہر

بالی وُڈ کے معروف فلم ساز کرن جوہر بھی تاحال غیر شادی شدہ ہیں اور انہوں نے سنگل رہنے کا انتخاب اپنی مرضی سے کیا ہے۔

وہ اپنی ذاتی زندگی کے بارے میں ہمیشہ کھل کر بات کرتے ہیں۔

ان کے مطابق خوش گوار شادی جیسی کوئی چیز وجود نہیں رکھتی۔ 53 برسکے کرن جوہر ’سروگیسی‘ کے ذریعے ایک بیٹے یش اور بیٹی روحی کے والد ہیں۔

وہ اپنی والدہ ہیرو جوہر اور دونوں بچوں کے ساتھ رہائش پذیر ہیں اور فی الحال شادی کرنے کا کوئی ارادہ نہیں رکھتے۔