ریاض اور مشرقی ریجن میں گرد وغبار، جازان اور عسیر میں بارش

محکمہ موسمیات نے آج  پیر کو موسم کی صورتحال سے متعلق اپنی رپورٹ میں پیشگوئی کی ہے کہ مشرقی ریجن، ریاض، نجران اورملک کے جنوب مغربی بالائی علاقوں کے مشرقی حصوں میں گرد و غبار اُڑانے والی ہوائیں چلیں گی۔

سبق ویب سائٹ کے مطابق جازان اور عسیر کے بعض حصوں میں گرج چمک کے ساتھ بارش برسنے کے امکانات بھی موجود ہیں۔

محکمہ موسمیات نے کہا ہے کہ ’آج کے دن بعض علاقوں میں درجہ حرارت بلند رہے گا جن میں مکہ مکرمہ اور مدینہ منورہ بھی شامل ہے جہاں 42 ڈگری سینٹی گریڈ ہوگی‘۔

’ جبکہ الباحہ میں سب سے کم درجہ حرارت 19 ڈگری سینٹی گریڈ رہے گی‘۔

محکمے نے کہا ہے کہ ’جدہ اور جازان میں نمی کی شرح 85 فیصد تک رہنے کے امکانات ہیں‘۔

محکمے نے کہا ہے کہ ’بحیرہ احمر میں شمال مغربی ہوا چلے گی جس کی رفتار 45 کلو میٹر فی گھنٹہ تک ہوسکتی ہے جس کے باعث دو میٹر تک اونچی موجیں اٹھنے کے امکانات ہیں‘۔

’اسی طرح خلیج عربی کے سمندر میں شمال مغربی ہوا چلے گی جس کی رفتار 40 کلو میٹر فی گھنٹہ تک ہوسکتی ہے اور جس کے باعث ایک سے ڈیڑھ میٹر اونچی موجیں اٹھیں گی‘۔