یرغمالیوں کی رہائی کے لیے اسرائیل کو بمباری روکنا ہوگی: امریکی وزیر خارجہ

امریکی وزیر خارجہ مارکو روبیو نے کہا ہے کہ فلسطین کے عسکری گروپ حماس سے یرغمالیوں کی رہائی کے لیے اسرائیل کو غزہ میں بمباری روکنا ہوگا۔

خبر رساں ایجنسی اے ایف پی کے مطابق اتوار کو روبیو نے سی بی ایس نیوز کے ٹاک شو ’فیس دی نیشن‘ میں گفتگو کرتے ہوئے کہا کہ ’اسرائیلی اور دیگر سب لوگ بھی سمجھتے ہوں گے کہ حملوں کے دوران یرغمالیوں کی رہائی نہیں ہو سکتی، اس لیے حملوں کو روکنا ہوگا۔‘

ان کا کہنا تھا کہ ’ایسے وقت جب جنگ جاری ہو یرغمالیوں کی رہائی نہیں ہو سکتی۔‘

ادھر سی این این کے رپورٹر کو امریکی صدر ٹرمپ نے ٹیکسٹ میسج میں تصدیق کی ہے کہ ’اسرائیلی وزیراعظم نیتن یاہو غزہ میں فوجی مہم کو ختم کرنے کے لیے آن بورڈ ہیں۔‘

خبر رساں ایجنسی روئٹرز کے مطابق اتوار کو امریکی وزیر خارجہ کا کہنا تھا کہ حماس کی جانب سے یرغمالیوں کی رہائی پہلا مرحلہ ہوگا جبکہ اس کے بعد کیا ہونا ہے اُس پر ابھی کام کرنے کی ضرورت ہے۔

انہوں نے کہا کہ حماس ’بنیادی طور پر‘ صدر ٹرمپ کی تجویز پر راضی ہوئی ہے اور یرغمالیوں کی رہائی کے فریم ورک کو تسلیم کیا ہے تاہم اس کے لیے طریقہ کار پر بات چیت جاری ہے۔

مارکو روبیو نے نے کہا کہ ’وہ اصولی اور عمومی طور پر اس خیال سے متفق ہوئے ہیں کہ اس کے بعد کیا ہونے والا ہے۔ وہاں اس کی بہت ساری تفصیلات پر کام کرنا پڑے گا۔‘

انھوں نے کہا کہ امریکہ کو ’بہت جلد‘ معلوم ہو جائے گا کہ آیا یرغمالیوں کی رہائی کے لیے موجودہ تکنیکی مذاکرات کے دوران حماس سنجیدہ ہے یا نہیں۔

امریکی وزیر خارجہ کے مطابق ’پہلی ترجیح جس کے بارے میں ہمیں لگتا ہے کہ ہم امید کے ساتھ بہت جلد کچھ حاصل کر سکتے ہیں، اور وہ ہے اسرائیلی فوج کے پیچھے ہٹنے کے بدلے میں تمام یرغمالیوں کی رہائی۔‘

ان کا کہنا تھا کہ اس کے تحت اسرائیل اُس پیلی لکیر کی طرف جائے گا جہاں اگست کے وسط میں اُس کی افواج غزہ میں کھڑی تھیں۔‘

انہوں نے غزہ کے طویل المدتی مستقبل کے دوسرے مرحلے کو ’اور بھی مشکل‘ قرار دیا۔

امریکی وزیر خارجہ کا کہنا تھا کہ ’اسرائیل کے دوبارہ پیلی لکیر کی طرف واپس جانے اور ممکنہ طور پر اس سے بھی پیچھے جانے کے بعد کیا ہوتا ہے، یہ چیز کیسے آگے بڑھتی ہے؟ آپ اس فلسطینی ٹیکنوکریٹک قیادت کو کیسے تخلیق کرتے ہیں جو حماس نہیں؟‘

مارکو روبیو نے کہا کہ ’آپ کسی بھی قسم کے دہشت گرد گروپوں کو کیسے غیر مسلح کریں گے جو سرنگیں بنا رہے ہوں گے اور اسرائیل کے خلاف حملے کر رہے ہوں گے؟ آپ انہیں کیسے غیر فعال کریں گے؟‘

انہوں نے مزید کہا کہ ’یہ سارا کام بہت مشکل ہو گا، لیکن یہ بہت اہم ہے، کیونکہ اس کے بغیر آپ کو دیرپا امن حاصل نہیں ہو گا۔‘