سعودی عرب کے وژن 2030 سے بہت کچھ سیکھ سکتے ہیں، وزیر خزانہ
جمعہ 10 اکتوبر 2025 10:17
پاکستان کے وزیر خزانہ محمد اورنگزیب نے کہا ہے کہ ’سعودی وژن 2030 کو دنیا میں منفرد مقام حاصل ہو رہا ہے۔ سعودی عرب کے وژن 2030 سے بہت کچھ سیکھ سکتے ہیں۔‘
کراچی میں سعودی سرمایہ کاروں اور اوورسیز چیمبر آف کامرس سے اپنے ورچوئل خطاب میں محمد اورنگزیب نے کہا کہ ’پاکستان میں سعودی سرمایہ کاروں کا خیرمقدم کرتے ہیں۔ وفاقی کابینہ نے پاکستان اور سعودی عرب کے درمیان تاریخی دفاعی معاہدے کی توثیق کی ہے۔‘
انہوں نے کہا کہ سرمایہ کاروں کو سازگار ماحول کی فراہمی حکومت کی ذمہ داری ہے۔ ’برآمدات پر مبنی معاشی ترقی کے لیے پُرعزم ہیں۔‘
وزیر خزانہ محمد اورنگزیب نے کہا کہ حکومتی کاوشوں کی بدولت ملک کو معاشی استحکام ملا۔ تین بڑی ریٹنگ ایجنسیوں نے پاکستان کے معاشی اشاریوں کو مثبت قرار دیا۔
انہوں نے بتایا کہ توانائی اور ٹیکس سمیت مختلف شعبوں میں بنیادی اصلاحات کے ایجنڈے پر عمل پیرا ہیں۔ ’ہم کیش لیس معیشت کی جانب بڑھ رہے ہیں، معیشت میں ڈیجیٹائزیشن سے شفافیت آئے گی۔‘
وزیر خزانہ نے مزید بتایا کہ وہ آئی ایم ایف کی سالانہ میٹنگ کے سلسلے میں آج رات واشنگٹن روانہ ہوں گے۔
