کراچی میں ’آباد‘ اور سعودی پاکستان بزنس کونسل کے درمیان ایم او یو پر دستخط

پاکستان اور سعودی عرب کے درمیان اقتصادی تعاون بڑھانے کے لیے ایسوسی ایشن آف بلڈرز اینڈ ڈیویلپرز (آباد) اور سعودی پاکستان جوائنٹ بزنس کونسل (ایس پی بی سی) نے مفاہمت کی ایک یادداشت (ایم او یو) پر دستخط کیے ہیں۔   
ایم او یو پر دستخط سعودی پاکستان جوائنٹ بزنس کونسل کے چیئرمین شہزادہ منصور بن محمد آل سعود کی موجودگی میں جمعے کو کراچی میں ہونے والی تقریب میں کیے گئے۔

مفاہمت کی اس یادداشت پر ’آباد‘ کی جانب سے سینیئر وائس چیئرمین سید افضل حمید اور سعودی پاکستان جوائنٹ بزنس کونسل کے وائس چیئرمین محمد عبدالعزیز الجلان نے کراچی میں دستخط کیے۔
معاہدے کے تحت ’آباد‘ اور سعودی پاکستان جوائنٹ بزنس کونسل نے دو طرفہ تعلقات کو مضبوط بنانے، سرمایہ کاری کے مواقع بڑھانے اور تجارت و تعمیرات سے متعلق سرگرمیوں میں توسیع کے لیے ایک جامع فریم ورک تشکیل دیا ہے۔ 
اس معاہدے کے مطابق ’آباد‘ اور سعودی پاکستان بزنس کونسل، پاکستان کے تعمیراتی اور ریئل اسٹیٹ سیکٹر میں سعودی سرمایہ کاری کی حوصلہ افزائی کریں گے اور تعمیراتی منصوبوں میں جوائنٹ وینچر کے امکانات تلاش کریں گے۔
اس موقع پر سید افضل حمید نے کہا کہ سعودی پاکستان جوائنٹ بزنس کونسل کے درمیان شراکت داری پاکستان اور سعودی عرب کے درمیان اقتصادی انضمام کی جانب ایک اہم سنگ میل ہے۔
اُن کا کہنا تھا کہ مفاہمت کی یہ یادداشت پاکستان کے تعمیراتی اور ریئل اسٹیٹ سیکٹر میں غیر ملکی سرمایہ کاری کو راغب کرنے، روزگار کے مواقع پیدا کرنے اور پاکستان کی تعمیراتی صنعت کو مستحکم بنانے میں مددگار ثابت ہو گی۔