پنجاب میں سعودی عرب کی سرمایہ کاری ترقی کا نیا دور لائے گی: مریم نواز

پاکستان کے صوبہ پنجاب کی وزیراعلیٰ مریم نواز شریف نے کہا ہے کہ ’خادم الحرمین الشریفین پاکستان کے ساتھ تعلقات کو نئی جہت پر لے جائیں گے۔ پاکستان سعودی مشترکہ بزنس کونسل کے وفد کو پاکستان میں خوش آمدید کہتی ہوں۔‘

وزیر اعلیٰ مریم نواز نے سنیچر کو لاہور میں سعودی وفد کے اعزاز میں تقریب سے خطاب کرتے ہوئے کہا کہ ’سعودی عرب اور پاکستان کے دفاعی معاہدے کو پاکستانی عوام نے بے حد سراہا ہے۔‘

انہوں نے کہا کہ ’اس وفد کی آمد پنجاب کے لیے خوش بختی کی علامت ہے۔ پنجاب کی حکومت اس وقت جدید خطوط پر کام کر رہی ہے اور یہاں سرمایہ کاری کے بہت سے مواقع ہیں۔‘

وزیر اعلیٰ کا کہنا ہے کہ ’پاکستان اور سعودی عرب کے درمیان باہمی اتحاد اور بھائی چارے کا رشتہ ہے۔‘

مریم نواز نے کہا کہ ’مجھے اپنے بھائی ولی عہد شہزادہ محمد بن سلمان سے ملاقات کا شرف حاصل ہوا، وہ جس انداز میں ترقی کے بارے میں بات کرتے ہیں۔ انہیں سننا ایک اعزاز کی چیز ہے۔ وہ واقعی ایک انسپائریشن ہیں۔ وہ مملکت تو جدت کے نئے آفاق کی جانب لے جا رہے ہیں۔‘

انہوں نے کہا کہ ’ولی عہد نے مجھ سے کہا کہ میں اپنی ٹیم سے کہتا ہوں کہ آپس میں بات کریں، بالکل یہی بات میں اپنی ٹیم سے کہتی ہوں۔‘

’میرے والد نواز شریف کا سعودی عرب کے ساتھ محبت، اعتماد اور دوستی کا دہائیوں پرانا تعلق ہے۔ میں خود بھی سات برس تک سعودی عرب میں رہ چکی ہوں۔ مشرف دور میں ہمیں جلاوطنی کے دوران جدہ میں قیام کرنا پڑا تھا۔ اسی لیے میں جدہ کو لاہور سے زیادہ جانتی ہوں۔‘

انہوں نے پاکستان اور سعودی عرب کے درمیان گزشتہ ماہ ہونے والے دفاعی معاہدے کو سراہتے ہوئے کہا کہ ’پاکستان پر اعتماد کرنے پر سعودی عرب کے شکرگزار ہیں۔ پاکستان ہر وقت سعودی عرب کے ساتھ کھڑا ہے۔ مکہ اور مدینہ کی پاسبانی پاکستان کے لیے اعزاز کی بات ہے۔‘

’سیلاب کی تباہ کاریوں کے دوران سعودی عرب نے پنجاب کی فراخدلی سے مدد کی۔ اس قبل بھی سعودی عرب نے ہمیشہ پاکستان کی مدد کی۔‘

وزیراعلیٰ نے کہا کہ ’مجھے امید ہے پنجاب میں سعودی عرب کی سرمایہ کاری ترقی کا نیا دور لائے گی۔‘

ہم پنجاب میں سرمایہ کاری کے لیے پرعزم ہیں: شہزادہ منصور بن محمد آل سعود

سعودی پاکستان بزنس کونسل کے سربراہ شہزادہ منصور بن محمد آل سعود نے اس موقعے پر گفتگو کرتے ہوئے بہترین میزبانی پر وزیراعلیٰ مریم نواز کا شکریہ ادا کیا اور کہا ہے کہ ہم نے یہاں آنے سے قبل سرکاری اور نجی شعبے میں موجود امکانات کا معالعہ کیا ہے۔‘

انہوں نے کہا کہ ’ہمارے ایجنڈے میں بہت سی چیزیں شامل ہیں خاص طور پر زراعت۔ پنجاب کی زمینیں بہت زرخیر ہیں، ہم پنجاب میں سرمایہ کاری کے لیے پرعزم ہیں اور پنجاب سے شراکت داری بہت اہمیت کی حامل ہے۔‘

انہوں نے کہا سعودی سرمایہ کاروں کو بہت پہلے پاکستان آنا چاہیے تھا۔

شہزادہ منصور بن محمد آل سعود نے کہا سعودی عرب اور پاکستان کے درمیان نئے دور کا آغاز ہو چکا ہے۔

انہوں نے کہا کہ ’ہم پاکستان میں صرف کاروبار کے لیے نہیں آ رہے بلکہ ہم پاکستان کے ساتھ مل کر درپیش چیلنجز کے حل کے لیے کام کریں گے۔ ہم اگلے چار برس میں کم لاگت میں 10 لاکھ گھر تعمیر کریں گے۔‘

انہوں نے پاکستان میں صحت، انفارمیشن ٹیکنالوجی اور زراعت سمیت کئی شعبوں میں شراکت داری کے عزم کا اعادہ کیا ہے۔