انڈیا میں ہاتھیوں کی آبادی میں ایک چوتھائی کمی، نئے سروے میں انکشاف
انڈیا میں جنگلی ہاتھیوں کی آبادی کے تخمینے میں تقریباً ایک چوتھائی کمی ریکارڈ کی گئی ہے۔
خبر رساں ادارے اے ایف پی کی رپورٹ میں کہا گیا ہے کہ حکومت کے ایک نئے سروے ، جس میں ڈی این اے پر مبنی نظام شامل کیا گیا، کے مطابق یہ اب تک کا سب سے درست لیکن تشویش ناک تخمینہ ہے۔
انڈیا دنیا کے باقی ماندہ جنگلی ایشیائی ہاتھیوں کی اکثریت کا مسکن ہے آئی یو سی این کے مطابق خطرے سے دوچار نسل ہے، اور جس کے لیے سکڑتے ہوئے جنگلات اور مسکن ایک بڑھتا ہوا خطرہ بن چکے ہیں۔
وائلڈ لائف انسٹیٹیوٹ آف انڈیا کی جانب سے اس ہفتے جاری ہونے والی آل انڈیا ایلیفینٹ ایسٹیمیشن رپورٹ کے مطابق ملک میں جنگلی ہاتھیوں کی تعداد 22,446 ہے، جو 2017 میں تخمینہ لگائی گئی 29,964 کی نسبت 25 فیصد کم ہے۔
یہ سروے 21 ہزار سے زائد ہاتھیوں کے فضلے کے جینیاتی تجزیے، وسیع کیمرا ٹریپ نیٹ ورک اور 6.67 لاکھ کلومیٹر پیدل سروے پر مبنی ہے۔
تاہم محققین کا کہنا ہے کہ طریقۂ کار میں بڑی تبدیلی کے باعث ان نتائج کا پچھلے تخمینوں سے موازنہ نہیں کیا جا سکتا، اور انہیں ’ایک نئی مانیٹرنگ بنیاد‘ سمجھا جانا چاہیے۔
’نرم دل دیو قامت مخلوق‘
رپورٹ نے خبردار کیا کہ یہ اعداد و شمار انڈیا کے ایک علامتی جانور پر بڑھتے دباؤ کی عکاسی کرتے ہیں۔
رپورٹ میں کہا گیا ہے کہ ’انڈیا میں ہاتھیوں کی موجودہ تقسیم ان کے تاریخی مسکن کے صرف ایک معمولی حصے کی نمائندگی کرتی ہے۔‘
تخمینے کے مطابق وہ اب اپنی سابقہ حدود کے صرف 3.5 فیصد علاقے میں پائے جاتے ہیں۔
رپورٹ کے مطابق، رہائشی علاقوں کا سکڑاؤ، جنگلات کا ٹکڑوں میں تقسیم ہونا، اور انسان و ہاتھی کے درمیان بڑھتے تصادم ان کی آبادی میں کمی کے بڑے عوامل ہیں۔
’بجلی کے جھٹکوں اور ریلوے حادثات سے ہاتھیوں کی بڑی تعداد ہلاک ہو جاتی ہے، جبکہ کان کنی اور سڑکوں کی تعمیر ان کے قدرتی مسکن کو متاثر کر رہی ہے، جس سے انسان اور جنگلی حیات کے درمیان تنازع مزید بڑھ رہا ہے۔‘
جنوبی انڈیا کے سرسبز پہاڑی سلسلے ویسٹرن گھاٹس، جو کرناٹک، تمل ناڈو اور کیرالا تک پھیلے ہوئے ہیں، میں اب بھی تقریباً 12 ہزار ہاتھی موجود ہیں۔
تاہم یہاں بھی ہاتھیوں کے جُھنڈ تجارتی باغات، زرعی باڑوں اور انسانی تجاوزات کی وجہ سے ایک دوسرے سے کٹتے جا رہے ہیں۔
ایک اور بڑی آبادی شمال مشرقی انڈیا میں، خصوصاً آسام اور برہم پُترا کے میدانی علاقوں میں پائی جاتی ہے، جہاں 6,500 سے زیادہ ہاتھی موجود ہیں۔
