پی آئی اے کی پانچ برس بعد برطانیہ کے لیے پہلی پرواز آج اسلام آباد سے روانہ ہو گی

پاکستان انٹرنیشنل ایئرلائن کے پانچ سال بعد برطانیہ کے لیے فلائٹ آپریشن بحال ہونے کے بعد پہلی پرواز آج روانہ ہونے جا رہی ہے۔ 

قومی ایئر لائن پی آئی اے کی ویب سائٹ پر موجود فلائٹ شیڈیول کے مطابق پہلی براہ راست پرواز آج اسلام آباد سے 12 بج کر پانچ منٹ پر مانچسٹر کے لیے روانہ ہو گی جو شام پانچ بجے پہنچے گی۔

پانچ سال کے عرصے کے بعد پی آئی اے دوبارہ اس روٹ پر اپنے آپریشن شروع کرنے جا رہا ہے۔

اس سے قبل ترجمان پی آئی اے نے کہا تھا کہ پہلے مرحلے میں اسلام آباد سے مانچسٹر کے لیے ہفتہ وار سنیچر اور منگل کو دو پروازیں آپریٹ کریں گے اور 15 گھنٹے کی مسافت کے بجائے 8 گھنٹوں میں مانچسٹر پہنچ سکیں گے۔

ترجمان کے مطابق مانچسٹر کی پروازوں میں بتدریج اضافہ کیا جائے گا اور دوسرے مرحلے میں لندن کی پروازیں بھی شروع کی جائیں گی۔

رواں ماہ کے آغاز میں ہی پروازیں بکنگ کے لیے کھول دی گئی تھیں۔

برطانیہ نے جولائی میں پاکستانی ایئرلائنز پر عائد پابندیاں ختم کر دی تھیں جو 2020 میں کراچی میں پی آئی اے کے ایئربس اے 320 طیارے کے حادثے کے بعد لگائی گئی تھیں۔ اس حادثے میں 97 افراد کی موت واقع ہوئی تھی۔

حادثے کے بعد پائلٹ لائسنسنگ میں بے ضابطگیوں کے الزامات سامنے آئے جس کے نتیجے میں برطانیہ اور یورپی یونین دونوں نے پابندیاں عائد کر دی تھیں۔

پی آئی اے کی واپسی سے پاکستانی تارکین وطن کے لیے سفر آسان ہونے کی توقع ہے جبکہ تجارتی روابط مضبوط ہوں گے اور آمدنی میں اضافہ ہوگا۔

واضح رہے کہ برطانیہ پاکستان کا تیسرا بڑا تجارتی شراکت دار ہے اور دونوں ممالک کے درمیان سالانہ تجارت کا حجم تقریباً چار کروڑ 70 ارب پاؤنڈ  ہے۔