انڈین دارالحکومت دہلی کے لال قلعے کے قریب ایک کار میں ہونے والے زوردار دھماکے کے نتیجے میں8 افراد ہلاک اور 11 زخمی ہوئے ہیں۔
انڈین ٹی وی چینل این ڈی ٹی وی کے مطابق دھماکہ اتنا شدید تھا کہ قریب موجود تین سے چار گاڑیاں بھی آگ کی لپیٹ میں آ گئیں اور انہیں شدید نقصان پہنچا۔
دہلی پولیس کے ذرائع نے این ڈی ٹی وی بتایا کہ ’یہ ایک انتہائی طاقتور دھماکہ تھا۔‘
زخمیوں کو فوری طور پر ایل این جے پی ہسپتال منتقل کر دیا گیا ہے۔
لال قلعہ، جسے ریڈ فورٹ کے نام سے جانا جاتا ہے، دہلی کے پرانے علاقے میں واقع ہے اور شہر کی سب سے مشہور سیاحتی مقامات میں سے ایک ہے۔
دہلی فائر ڈیپارٹمنٹ کے مطابق، ’گیٹ نمبر 1 کے قریب لال قلعہ میٹرو سٹیشن کے پاس ایک کار میں دھماکے کی اطلاع ملی تھی۔‘
تقریباً 20 فائر بریگیڈ کی گاڑیاں موقع پر پہنچ گئیں، جبکہ پولیس نے پورے علاقے کو گھیرے میں لے لیا ہے۔ علاقے میں عام ٹریفک کو بھی معطل کر دیا گیا ہے۔
دھماکے کی نوعیت فی الحال معلوم نہیں ہو سکی۔
ایک عینی شاہد نے این ڈی ٹی وی کو بتایا کہ ’میں نے اپنے گھر کی چھت سے ایک بہت بڑا آگ کا گولا دیکھا۔ آواز بہت زوردار تھی، دھماکے سے عمارتوں کی کھڑکیاں ہل گئیں۔‘
ایک اور شخص نے بتایا کہ ’میں گوردوارے میں تھا جب ایک زوردار آواز سنی۔ ہم سمجھ ہی نہیں سکے کہ یہ کیا تھا، آواز اتنی تیز تھی۔‘
یہ واقعہ اسی روز پیش آیا جب ہریانہ کے فریدآباد میں ایک کرائے کے مکان سے دھماکہ خیز مواد کی بھاری مقدار برآمد کی گئی تھی اور ایک ڈاکٹر کو گرفتار کیا گیا تھا۔
