مدینہ منورہ میں ’ٹاپ شیف‘ مقابلے، 100 ماہرین کی شرکت
مدینہ منورہ میں ’ٹاپ شیف‘ مقابلے، 100 ماہرین کی شرکت
جمعرات 13 نومبر 2025 5:28
مدینہ منورہ کو پکوان کے حوالے سے یونیسکو کی لسٹ میں شامل کیا گیا تھا(فوٹو، ایس پی اے)
اقوام متحدہ کی تعلیمی ، سائنسی اور ثقافتی تنظیم ’یونیسکو‘ کی جانب سے مدینہ منورہ کو پکوانوں کے شعبے میں تخلیقی شہروں کے نیٹ ورک میں شامل کرنے کے اعلان کے بعد 2 روزہ ’مدینہ ٹاپ شیف‘ مقابلے کا دوسرا ایڈیشن منعقد کیا گیا۔
سعودی خبررساں ایجنسی ’ایس پی اے‘ کے مطابق پکوانوں کے مقابلے میں 100 سے زائد مرد وخواتین ماہرین شرکت کررہے ہیں۔
ٹاپ شیف مقابلے کا انعقاد کالج آف ٹورازم اینڈ ہاسپیٹلیٹی ٹیکنالوجی میں ہوا جو کل تک جاری رہے گا۔ مقابلے کا مقصد ماہرین کی فنکارانہ صلاحیتوں کو اجاگر کرنا ہے جس سے انکی پیشہ ورانہ زندگی پر بھی مثبت اثرات مرتب ہوں گے۔
کالج کے ڈین عبدالقادر الصاعدی نے بتایا کہ یہ مقابلہ کالج کے اقدامات میں سے ایک ہے جسے ٹیکنیکل اینڈ ووکیشنل ٹریننگ کارپوریشن کے ٹرینیز فنڈ کا تعاون حاصل ہے۔
ٹاپ شیف مقابلہ کالج آف ٹورازم اینڈ ہاسپیٹلیٹی ٹیکنالوجی میں ہوا (فوٹو، ایس پی اے)
انکا مزید کہنا تھا کہ اس برس مقابلہ غیرمعمولی اہمیت کا حامل ہے کیونکہ مدینہ منورہ کو پکوانوں کے حوالے سے یونیسکو کے تخلیقی شہروں کے نیٹ ورک میں شامل کیا گیا ہے۔
الصاعدی نے واضح کیا کہ مقابلے کے ذریعہ ہم مدینہ کی مثالی شناخت کو اجاگر کرنے کے لیے کوشاں ہیں جو صداقت اور تخلیقی صلاحیتوں کویکجا کرتا ہے۔
