پاکستان اور بحرین کے مضبوط تعلقات کو معاشی تعاون میں بدلنے کے عزم کا اظہار

وزیراعظم محمد شہباز شریف نے کہا ہے کہ پاکستان معاشی اصلاحات اور نجی شعبے کی قیادت میں ترقی کے نئے دور میں داخل ہو رہا ہے اور بحرین سمیت خطے کے سرمایہ کاروں کے لیے زراعت، آئی ٹی، معدنیات، توانائی اور دیگر اہم شعبوں میں سرمایہ کاری کے وسیع مواقع موجود ہیں۔

جمعرات کو منامہ میں کاروباری برادری کی تقریب سے خطاب کرتے ہوئے انہوں نے بحرینی سرمایہ کاروں کو پاکستان میں شراکت داری اور مشترکہ منصوبوں کے آغاز کی دعوت دی، وزیر اعظم کا کہنا تھا کہ حکومت سرمایہ کاری کے فروغ اور کاروبار میں آسانی کے لیے ہر ممکن سہولت فراہم کرے گی۔

سرکاری خبر رساں ادارے اے پی پی کے مطابق وزیراعظم نے کہا کہ ’پاکستان اور بحرین کئی دہائیوں سے بھائی چارے، ثقافتی ہم آہنگی اور باہمی احترام پر مبنی مضبوط تعلقات کے حامل ہیں، اب وقت آ گیا ہے کہ ان تعلقات کو اقتصادی تعاون میں بدلا جائے۔‘

انہوں نے کہا کہ پاکستان اور خلیج تعاون کونسل کے درمیان آزاد تجارت کا معاہدہ حتمی مراحل میں ہے جو دونوں ممالک کے تجارتی روابط کو نئی بلندیوں تک لے جائے گا۔

وزیراعظم نے بحرین کی قیادت کی جانب سے پرتپاک استقبال پر شکریہ ادا کرتے ہوئے کہا کہ دونوں ممالک کے درمیان تزویراتی تعاون کو مزید وسعت دینے کے بھرپور امکانات موجود ہیں۔

انہوں نے زور دیا کہ پاکستانی نوجوان ملک کی بڑی طاقت ہیں، جنہیں آئی ٹی، اے آئی اور فنی شعبوں میں تربیت دے کر خطے کی ابھرتی معیشتوں کے لیے موثر انسانی وسائل میں تبدیل کیا جا رہا ہے۔

شہباز شریف نے بحرین میں مقیم ایک لاکھ سے زائد پاکستانیوں کی خدمات کو خراج تحسین پیش کرتے ہوئے کہا کہ گزشتہ مالی سال کے دوران ان کی ترسیلات زر 48 کروڑ 40 لاکھ ڈالر تک پہنچیں، جو پاکستانی معیشت کے لیے انتہائی قیمتی ہیں۔

بحرین کے وزیر خزانہ شیخ سلمان بن خلیفہ الخلیفہ نے تقریب سے خطاب کرتے ہوئے کہا کہ پاکستانی کمیونٹی نے بحرین کی ترقی میں نمایاں کردار ادا کیا ہے اور دونوں ممالک کے تعلقات نسل در نسل مضبوط ہوئے ہیں۔

انہوں نے کہا کہ بحرین خطے میں مالیاتی جدت اور فِن ٹیک کے مرکز کے طور پر ابھر رہا ہے اور پاکستانی اداروں کے لیے بھرپور مواقع موجود ہیں۔