ریاض سیزن 2025 میں وزیٹرز کی تعداد پانچ ملین سے تجاوز کرگئی
حالیہ دنوں میں وزیٹرز کی تعداد میں اضافہ دیکھنے میں آیا ہے (فوٹو: ایکس اکاونٹ)
سعودی جنرل انٹرٹینمنٹ اتھارٹی کے بورڈ آف ڈائریکٹرز کے چیئرمین ترکی آل الشیخ نے اعلان کیا کہ’ ریاض سیزن 2025 کے آغاز سے اب تک وزیٹرز کی تعداد پانچ ملین سے تجاوز کرگئی ہے۔‘
ایس پی اے کے مطابق یہ سنگ میل،عوامی شرکت میں مسلسل اضافے، سیزن کے متنوع آرٹسٹک، سپورٹس، کلچرل اور گیمنگ ایونٹس میں بڑھتی ہوئی دلچسپی کو ظاہر کرتا ہے۔
حالیہ دنوں میں وزیٹرز کی تعداد میں نمایاں اضافہ دیکھنے میں آیا ہے جو مملکت کے مختلف ریجنز سے آنے والے رہائشیوں اور سیاحوں کی آمد کی وجہ سے ہوا ہے۔
اس سیزن کے مختلف پروگراموں میں غیر معمولی ٹرن آوٹ ریکارڈ کیا گیا، جن میں سب سے اہم یمنی کلچر ویک ہے، السویدی پارک سیزن کے نمایاں مقامات میں سے ایک بن گیا ہے۔
گزشتہ ہفتے ریاض سیزن میں باکسنگ ویک کے ایونٹس اور سنوکر چیمپین شپ نے بھی وزیٹرز کی توجہ حاصل کی۔
حال ہی میں ریاض چڑیا گھر کا بھی افتتاح ہوا ہے، اس میں 170 اقسام کے ایک ہزار 600 سے زیادہ جانور ہیں، یہاں چھ زون ہیں، جنہیں مختلف براعظموں کے قدرتی مسکن کی طرز پر ڈیزائن کیا گیا ہے۔
یاد رہے اس سیزن کا آغاز امریکی کمپنی میسی کے تعاون سے ایک رنگا رنگ گلوبل پریڈ سے ہوا تھا، جو وژول اور آرٹسٹک پرفارمنس کے امتزاج کے ساتھ اپنی نوعیت کی منفرد تقریب تھی۔
افتتاح کے بعد سے اس سیزن میں متعدد بڑے انٹرنیشنل ایونٹس کا انعقاد کیا گیا۔ انا عربیہ اور جیولری سیلون سمیت انٹرنیشنل ایگزیبیشن کے ساتھ اپنی ثقافتی اور تجارتی اپیل کو مزید بڑھایا ہے۔
سیزن میں 11 تفریحی مقامات ہیں جبکہ 15 عالمی مقابلے اور 34 نمائشیں وغیرہ شامل ہیں۔ ان کے علاوہ بہت سے چھوٹے پروگراموں میں آئندہ 4 ماہ تک 7 ہزار سے زائد ایونٹس ہوں گے۔
بولیوارڈ ورلڈ میں نئے انٹرنیشنل زون ہیں، نئے اضافہ میں انڈونیشیا، کویت اور جنوبی کوریا کی ثقافتی نمائندگی شامل ہے جس سے کل ثقافتوں کی تعداد 24 ہوگئی۔
ریاض سیزن 2025 میں 25 ہزار سے زیادہ براہ راست جبکہ ایک لاکھ سے زیادہ بالواسطہ ملازمتیں فراہم کی گئی ہیں۔
