پاکستانی فضائیہ کے سامنے رافیل طیاروں کی صلاحیت صفر ثابت ہوئی: ایئر چیف

پاکستانی فضائیہ کے سربراہ ایئر چیف مارشل ظہیر احمد بابر سدھو نے کہا ہے کہ ’10 مئی کو دشمن کو منہ توڑ جواب دے کر پاکستانی فضائیہ نے سائبر وار فیئر میں اپنی برتری ثابت کی۔‘

منگل کو رسالپور اکیڈمی میں پاسنگ آؤٹ پریڈ سے خطاب کرتے ہوئے ایئر چیف مارشل ظہیر احمد بابر سدھو کا مزید کہنا تھا کہ ’رواں برس معرکہ حق کے دوران پاکستانی فضائیہ نے بہترین کارکردگی کا مظاہرہ کیا۔‘

‘مزید پڑھیں                                                                                      

’جب 6 اور 7 مئی کی رات پاکستان کی خود مختاری کو چیلنج کیا گیا تو پاکستانی فضائیہ نے دشمن کو بھرپور جواب دیتے ہوئے رافیل سمیت اس کے جدید ترین لڑاکا طیارے مار گرائے۔

پاکستانی فضائیہ کے سربراہ ایئر چیف مارشل ظہیر احمد بابر سدھو کا کہنا تھا کہ ’ہم نے دشمن کے ڈیفنس سسٹم کو کامیابی سے نشانہ بنایا اور اس کے جہاز گرائے۔ جس طرح  ہم نے منہ توڑ جواب دیا اس پر دنیا حیران ہے۔‘

پاکستانی فضائیہ کے سربراہ نے کہا کہ ’پاکستان کی سالمیت پر کبھی بھی آنچ نہیں آنے دیں گے، رافیل طیاروں کی صلاحیت پاک فضائیہ کے سامنے صفر ثابت ہوئی۔‘

’دشمن کی ہر حرکت کو پاک فضائیہ نے لمحوں میں مانیٹر کیا، ہمارے ایکشن اور آپریشن لمحوں میں کارگر ثابت ہوتے ہیں، آج کی جدید دنیا میں پاک فضائیہ پیشہ وارانہ صلاحیتوں سے لیس ہے۔‘

انہوں نے خبردار کرتے ہوئے کہا کہ ’اگر کسی نے ہماری امن کی خواہش کو چیلنج کیا تو اسے منہ کی کھانا پڑے گی۔‘

ایئر چیف مارشل ظہیر احمد بابر سدھو نے کہا کہ ’پاکستان آرمی کی جانب سے زمین پر بھی بھرپور کارروائی کی گئی اور دشمن کو شکست دی۔ فیلڈ مارشل عاصم منیر نے معرکہ حق میں قائدانہ کردار ادا کیا۔

پاکستانی فضائیہ کے سربراہ کے مطابق ’قوم اور مسلح افواج نے عددی برتری رکھنے کے باوجود دشمن کو شکست فاش سے دوچار کیا۔‘

انہوں نے عزم ظاہر کیا کہ پاکستان کی سلامتی پر کبھی آنچ نہیں آنے دیں گے۔ ہم کثیرالجہتی آپریشن کی صلاحیت رکھتے ہیں اور فضائیہ کا ہر جوان، افسر ہمہ وقت ملک کے لیے تیار ہے۔‘

ایئر چیف مارشل نے تربیت مکمل کرنے والے کیڈٹس کو مبارک دیتے ہوئے کہا کہ آپ ملک کا سرمایہ ہیں اور قوم کی امیدیں اب آپ کے کندھوں پر ہیں۔