داعش خراسان کے میڈیا کے سربراہ پاکستان کی حراست میں: سرکاری میڈیا

پاکستان کے سرکاری ٹیلی وژن نے رپورٹ کیا ہے کہ پاکستان کی انٹیلی جنس ایجنسیز نے رواں برس مئی میں شدت پسند تنظیم داعش خراسان (آئی ایس کے پی) کے ترجمان سلطان عزیر عزّام کو گرفتار کیا۔

پاکستان ٹیلی وژن (پی ٹی وی) کے مطابق سلطان عزیز داعش خراسان کے آفیشل میڈیا وِنگ ’العزائم‘ کے سربراہ بھی رہے ہیں۔

رپورٹ میں مزید کہا گیا کہ ’العزائم‘ داعش خراسان کی بھرتی اور پراپیگنڈا سرگرمیوں کی مرکزی تنظیم سمجھی جاتی ہے۔ خارجی عزیز عزام کی گرفتاری کے بعد اس تنظیم کی میڈیا سرگرمیاں بھی معطل ہو گئیں۔‘

’حالیہ دنوں میں پاکستانی حکام نے داعش خراسان میں سے کئی ہائی پروفائل گرفتاریاں کی ہیں۔ ان ہونے والی گرفتاریوں میں تنظیم کے ترجمان سلطان عزیز عزام کی 16 مئی 2025 کو کی گئی گرفتاری بھی شامل ہے۔‘
پی ٹی وی نے اپنی رپورٹ میں اقوامِ متحدہ کی اینالیٹیکل سپورٹ اینڈ سینکشنز مانیٹرنگ ٹیم کی16ویں رپورٹ کا حوالہ دیتے ہوئے کہا کہ اس رپورٹ کے مطابق پاکستان کی کارروائی سے داعش خراسان کے تنظیمی ڈھانچے کو عالمی سطح پر کمزور کر دیا گیا ہے۔ کئی منصوبہ بند حملے ناکام بنا دیے گئے جبکہ تنظیم کے جنگجوؤں کی تعداد میں کمی آئی ہے۔ اہم کمانڈرز و نظریاتی رہنماؤں کو نیوٹرلائز کر دیا گیا ہے۔‘
پاکستان مئی 2025 میں سلطان عزیز عزام اور سینیئر رہنما ابو یاسر الترکی کی گرفتاری جیسے اقدامات کے نتیجے میں تنظیم کی آپریشنل طاقت میں نمایاں کمی آئی ہے۔

’ان کارروائیوں کے باعث ’وائس آف خراسان‘ جیسے اہم پروپیگنڈا پلیٹ فارمز بھی معطل ہو گئے ہیں۔‘