پاکستان کے ٹی20 ورلڈ کپ 2026 میں شرکت یا اس کے طریقہ کار سے متعلق حتمی فیصلہ جمعہ یا آئندہ پیر کو کیے جانے کا امکان ہے۔
چیئرمین پاکستان کرکٹ بورڈ محسن نقوی نے ایکس پر پوسٹ کرتے ہوئے کہا کہ وزیراعظم میاں محمد شہباز شریف سے ایک مفید ملاقات ہوئی ہے۔ انہیں آئی سی سی سے متعلق معاملے پر بریفنگ دی، جس پر انہوں نے ہدایت دی کہ تمام آپشنز کھلے رکھتے ہوئے اس مسئلے کو حل کیا جائے۔ اس بات پر اتفاق ہوا کہ حتمی فیصلہ جمعہ یا آئندہ پیر کو کیا جائے گا۔‘
مزید پڑھیں
ذرائع کے مطابق پیر کو وزیراعظم ہاؤس میں ہونے والی ملاقات میں چیئرمین پی سی بی نے وزیراعظم کو انٹرنیشنل کرکٹ کونسل کے مبینہ دہرے معیار پر آگاہ کیا۔
Had a productive meeting with the Prime Minister Mian Muhammad Shahbaz Sharif. Briefed him on the ICC matter, and he directed that we resolve it while keeping all options on the table. It was agreed that the final decision will be taken either on Friday or next Monday. pic.twitter.com/6SOvNdLceW
— Mohsin Naqvi (@MohsinnaqviC42) January 26, 2026
محسن نقوی نے مؤقف اختیار کیا کہ آئی سی سی انڈیا کے لیے ایک جبکہ دیگر ممالک کے لیے مختلف اصول اپناتا ہے۔
چیئرمین پی سی بی نے نشاندہی کی کہ بنگلہ دیش کو نیوٹرل وینیو دینے کے بجائے ٹی20 ورلڈ کپ سے باہر کر دیا گیا، جبکہ انڈیا نے چیمپئنز ٹرافی میں پاکستان آنے سے انکار کیا تو اسے متبادل وینیو فراہم کیا گیا۔
اس سے قبل چیئرمین پی سی بی محسن نقوی واضح کر چکے تھے کہ ٹی20 ورلڈ کپ میں شرکت سے متعلق فیصلہ حکومتِ پاکستان کرے گی۔ ان کا کہنا تھا کہ بنگلہ دیش کے ساتھ زیادتی ہو رہی ہے اور یہ دہرا معیار ہے، ایک ملک سب کو ڈکٹیٹ نہیں کر سکتا، اور جیسا فیصلہ پاکستان اور انڈیا کے معاملے میں ہوا ویسا ہی بنگلہ دیش کے ساتھ بھی ہونا چاہیے۔
یاد رہے کہ بنگلہ دیش نے انڈیا میں میچز کھیلنے سے انکار کیا تھا، جس کے بعد آئی سی سی نے اسے ٹی20 ورلڈ کپ 2026 سے باہر کر کے اس کی جگہ سکاٹ لینڈ کو شامل کر لیا تھا۔ پاکستان نے اس فیصلے پر بنگلہ دیش سے اظہارِ یکجہتی بھی کیا تھا۔
