ابرار کی جگہ حارث رؤف شامل، بنگلہ دیش کا پاکستان کے خلاف پہلے بولنگ کا فیصلہ

پاکستان کے ساتھ تین ون ڈے انٹرنیشنل میچز کی سیریز کے دوسرے میچ میں بنگلہ دیش نے ٹاس جیت کر پہلے بولنگ کا فیصلہ کیا ہے۔

جمعے کو میرپور میں بنگلہ دیش کے کپتان مہدی حسن مرزا نے ٹاس جیت کر پہلے بولنگ کا فیصلہ کیا۔

آج کے میچ کے لیے پاکستان نے اپنی ٹیم میں ایک تبدیلی کی ہے اور مسٹری سپنر ابرار احمد کی جگہ فاسٹ بولر حارث رؤف کو شامل کیا گیا ہے، جبکہ بنگلہ دیش کی ٹیم میں کوئی تبدیلی نہیں کی گئی۔

خیال رہے کہ میرپور میں ہی پہلے میچ میں بنگلہ دیش نے پاکستان کو تمام شعبوں میں آؤٹ کلاس کرتے ہوئے آٹھ وکٹوں سے شکست دے دی تھی۔

پاکستان کی پوری ٹیم بنگلہ دیش کے فاسٹ بولر ناہید رانا کے آگے بے بسی کی تصویر بنی دکھائی دی اور 114 رنز پر آل آؤٹ ہو گئی۔ رانا نے پانچ وکٹیں حاصل کی تھیں۔

جواب میں بنگلہ دیش کے بیٹرز نے جارحانہ انداز میں کھیلتے ہوئے صرف 16 ویں اوور میں ہی دو وکٹوں کے نقصان پر ہدف حاصل کر لیا۔

دونوں ٹیموں کے سکواڈ:

پاکستان: صاحبزادہ فرحان، معاذ صداقت، شامل حسین، محمد رضوان (وکٹ کیپر)، سلمان علی آغا، حسین طلعت، عبدالصمد، فہیم اشرف، شاہین شاہ آفریدی (کپتان) اور حارث رؤف۔

بنگلہ دیش: سیف حسن، تنزید حسن، نجم الحسن شانتو، لٹن داس (وکٹ کیپر)، مہدی حسن مرزا (کپتان)، توحید ہردوئے، عفیف حسین، رشاد حسین، تسکین احمد، مستفیض الرحمٰن اور ناہید رانا۔