اسلام آباد میں تاجر عامر اعوان کا قتل، پانچ مشتبہ افراد گرفتار

اسلام آباد پولیس کے حکام کے مطابق آرچرڈ سکیم فارم ہاؤس میں تاجر عامر اعوان کے قتل میں ملوث ہونے کے شک میں پانچ افراد کو حراست میں لیا ہے۔

منگل کو اسلام آباد پولیس کے ایک اعلیٰ افسر نے نام ظاہر نہ کرنے کی شرط پر بتایا  کہ ’تھانہ شہزاد ٹاؤن کے علاقے میں کاروباری شخصیت کے قتل کے کیس میں پانچ افراد کو حراست میں لیا گیا ہے۔‘

اُنہوں نے یہ بھی واضح کیا کہ ’پولیس ان افراد کی شناخت کر رہی ہے تاکہ یہ تصدیق ہو سکے کہ حراست میں لیے گئے افراد ہی اس قتل میں ملوث ہیں۔‘

پولیس کے اعلیٰ ذرائع کے مطابق گرفتار افراد کا تعلق خیبر پختنخوا سے ہے اور انہیں مزید تفتیش کے لیے اسلام آباد منتقل کر دیا گیا ہے۔ 

’تاجر عامر اعوان کو گھر کے اندر خاندان کی موجودگی میں قتل کیا گیا‘

واضح رہے کہ اتوار اور سوموار کی درمیانی شب اسلام آباد کے تھانہ شہزاد ٹاؤن کے علاقے آرچرڈ سکیم کے فارم ہاؤس میں پانچ ملزمان نے اسلام آباد ٹویوٹا موٹرز شو روم کے مالک عامر اعوان کے گھر میں گھس کر انہیں قتل کیا۔

ایف آئی آر کے مطابق ملزمان نے بیوی اور بچوں کے سامنے، بیڈ روم میں معروف تاجر عامر اعوان کو نشانہ بنایا۔

مقتول کی اہلیہ نے پولیس کو دیے گئے بیان میں بتایا کہ وہ اور ان کے خاوند بیڈ روم میں موجود تھے جب اچانک تین ڈاکو شوہر پر حملہ کر رہے تھے، جبکہ دو دیگر ڈاکو اسلحہ لے کر کمرے کے باہر کھڑے تھے۔ اسی دوران ملزمان نے فائرنگ کی، جس سے عامر اعوان شدید زخمی ہوئے اور بعد ازاں ہسپتال میں دم توڑ گئے۔

ملزمان فرار ہوتے وقت سکیورٹی گارڈ سے بندوق اور موبائل فون بھی چھین کر لے گئے۔

اہل خانہ کا کہنا ہے کہ ملزمان کو سامنے آنے پر پہچانا جا سکتا ہے۔

واقعے کی سی سی ٹی وی فوٹیج میں دیکھا جا سکتا ہے کہ ملزمان اسلحے سے لیس فارم ہاؤس کی دیوار پھلانگ کر اندر داخل ہوئے۔

پولیس اس بات کی بھی تحقیقات کر رہی ہے کہ آیا یہ واقعہ ڈکیتی کے دوران پیش آیا یا ملزم کو کسی دشمنی کی بنیاد پر قتل کیا گیا۔

اسلام آباد میں تاجر کے قتل کا واقعہ سوشل میڈیا پر بھی زیر بحث رہا  ہے جہاں شہر کی سکیورٹی صورتحال پر سوالیہ نشان اٹھائے جا رہے ہیں۔