’روٹ ٹو مکہ‘ سعودی عرب کے انتظامات شاندار ہیں: پاکستانی عازمین

پاکستان میں اسلام آباد، کراچی اور لاہور ایئرپورٹ سے  روٹ ٹو مکہ پروجیکٹ کے تحت عازمین حج کی پروازوں کا سلسلہ جاری ہے۔

روٹ ٹو مکہ پروجیکٹ کا آغاز پاکستان میں اسلام آباد سے کیا گیا، پھر کراچی کو شامل کیا گیا، اس سال پہلی مرتبہ لاہور کے علامہ اقبال انٹرنیشنل ایئرپورٹ سے پروازوں کا آغاز کیا گیا ہے۔

اس انیشیٹیو کا مقصد عازمین حج کو ان کے ملک میں ہی امیگریشن خدمات فراہم کرنا ہے، تاکہ مملکت پہنچنے پر کسی قسم کی دشواری کا سامنا نہ کرنا پڑے اور وہ ایئرپورٹ سے براہ راست اپنے ہوٹلوں میں پہنچ جائیں۔

ایس پی اے کے مطابق لاہور ایئرپورٹ سے جانے والے پاکستانی عازمین حج نے روٹ ٹو مکہ پروجیکٹ کی تعریف کی اور انتطامات کو شاندار قرار دیا۔

پشاور کے رہائشی جاوید اقبال نے بتایا’ پہلی مرتبہ حج کے لیے جا رہا ہوں۔ ’روٹ ٹو مکہ‘ کے تحت سعودی عرب کے انتظامات دیکھ کر بہت خوشی ہوئی ہے۔‘

انہوں نے بتایا میرے والد بھی 1992 میں تین سال سعودی عرب میں رہ چکے ہیں۔ اب ایک بیٹا ریاض میں ایک فیکڑی میں کام کر رہا ہے۔‘

’حج پر جانے کی بہت خوشی ہے، اللہ ہم سب کا حج قبول کرے اور آسانی پیدا کرے۔

یاد رہے کہ سعودی وزارتِ داخلہ کے مکہ روٹ انیشیٹیو میں شامل ممالک کی تعداد 10 تک پہنچ گئی ہے۔

اس سال 10 ملکوں کے 17 ایئرپورٹس سے پروازیں چلائی جا رہی ہیں۔ مراکش، انڈونیشیا، ملائیشیا، پاکستان، بنگلہ دیش، ترکیہ، آئیوری کوسٹ، مالدیپ، سینیگال اور برونائی دارالسلام شامل ہیں۔

 مکہ روٹ انیشیٹیو کے تحت اب تک 12 لاکھ 54 ہزار 994 حجاج کو خدمات فراہم کی جاچکی ہیں۔