جینوا پل حادثے کا مقدمہ، اطالوی ہائی وے کمپنی کے سابق چیف ایگزیکٹو کو 12 سال قید کی سزا

ایک اطالوی عدالت نے جمعرات کو اٹلی کی ایک ہائی وے کمپنی ’آٹوسترا دے پر ایل اطالیہ‘ کے سابق چیف ایگزیکٹو کو جینوا کے ہائی وے پل کے ہولناک انہدام کے مقدمے میں مجرم قرار دے دیا، جس میں قریباً آٹھ سال قبل 43 افراد جان سے گئے تھے۔

امریکی نیوز ایجنسی اے پی کے مطابق سابق چیف ایگزیکٹو جیووانی کاسٹیلوچی کو چار سال تک جاری رہنے والے مقدمے اور چار گھنٹے کی مشاورت کے بعد 12 سال قید کی سزا سنائی گئی۔

وہ ان درجنوں ملزموں میں شامل ہیں جنہیں اس سانحے میں قصوروار ٹھہرایا گیا، جس نے اٹلی کے انفراسٹرکچر کی دیکھ بھال میں سنگین کوتاہیوں کو بے نقاب کیا۔

14 اگست 2018 کی صبح جینوا کے مورانڈی ہائی وے پل کا قریباً 200 میٹر (650 فٹ) طویل حصہ بارش کے دوران اچانک گر گیا، جس کے نتیجے میں درجنوں گاڑیاں نیچے جا گریں۔

منہدم ہونے والے پل کی تصاویر دنیا بھر میں دیکھی گئیں اور اس واقعے کی وجہ سے اطالوی عوام کو شدید صدمہ پہنچا، خاص طور پر اُس روز جب لاکھوں افراد 15 اگست کی روایتی ’فیراگوستو‘ تعطیلات کے لیے سفر پر روانہ رہے تھے، جو گرمیوں کی چھٹیوں کا عروج سمجھی جاتی ہیں۔

اس مقدمے میں 57 ملزم شامل ہیں جن میں ہائی وے کمپنی کے سابق اعلیٰ عہدیدار، اس کی انجینئرنگ کمپنی ’اسپیا‘ کے ماہرین، اور اٹلی کی وزارتِ انفراسٹرکچر و ٹرانسپورٹ کے سابق اہلکار شامل ہیں۔

اکثر ملزموں کو غفلت کے باعث پیش آنے والے حادثے اور متعدد افراد کے قتلِ غیر ارادی جیسے الزامات کا سامنا ہے، جو مبینہ طور پر پل کی مناسب دیکھ بھال نہ کرنے کے نتیجے میں عائد کیے گئے ہیں۔ یہ پل شمالی اٹلی کو فرانسیسی ریویرا سے ملانے والے ایک اہم راستے کا حصہ تھا۔

استغاثہ کا موقف تھا کہ برسوں تک لاپروائی سے کی گئی دیکھ بھال اس حادثے کا سبب بنی اور تمام ملزموں کے لیے مجموعی طور پر قریباً 400 سال قید کی سزاؤں کا مطالبہ کیا گیا تھا۔ تاہم ملزموں نے ان الزامات کی تردید کرتے ہوئے کہا کہ حادثہ تعمیراتی خرابی کے باعث پیش آیا۔

یہ فیصلے اور سزائیں اس مقدمے کا اختتام ہیں جو چار سال کے دوران 280 سے زائد سماعتوں پر مشتمل رہا۔

جینوا سے تعلق رکھنے والے اطالوی معمار رینزو پیانو کے ڈیزائن کردہ نئے پل کا افتتاح سال 2020 میں کیا گیا، جو مورانڈی پل کے متاثرین کی یادگار کے اوپر تعمیر کیا گیا ہے۔