دستکاری کے لیے باریک بینی اور صبر کی ضرورت ہوتی ہے: نجران کے دستکار

نجران ریجن میں کھجور کے پتوں کی بُنائی ایک قدیم روایتی دستکاری ہے جو مقامی ہنرمندوں کی اس مہارت کی عکاسی کرتی ہے کہ وہ کھجور کے قدرتی پتوں اور ریشوں کو روزمرہ استعمال کی مختلف اشیا مثلاً چٹائیوں، ٹوکریوں، گدوں، دستی پنکھوں اور رسیوں میں تبدیل کرتے ہیں۔

سعودی پریس ایجنسی کے مطابق ابا السعود محلے کی تاریخی مارکیٹ میں دکانوں پر نفاست سے بُنی ہوئی اشیا کی ایک وسیع رینج نمائش کے لیے رکھی جاتی ہے جو ثقافتی ورثے کو جدید ڈیزائن کے ساتھ خوبصورتی سے یکجا کرتی ہیں۔

ہنرمند اس بات پر زور دیتے ہیں کہ اس دستکاری کے لیے باریک بینی اور صبر کی ضرورت ہوتی ہے۔

اس عمل کا آغاز کھجور کے پتوں کو احتیاط سے منتخب کرنے اور تیار کرنے سے ہوتا ہے جس کے بعد انہیں مختلف اشیا اور شوخ رنگوں میں بُنا جاتا ہے۔

کئی خواتین ہنرمندوں نے بتایا کہ انہوں نے یہ دستکاری نسل در نسل ورثے میں حاصل کی ہے۔

انہوں نے اپنی تکنیکوں کو مزید نکھارتے ہوئے ایسی کارآمد اور جدید اشیا تیار کی ہیں جو مستند ثقافتی شناخت کو برقرار رکھنے کے ساتھ ساتھ خطے کے باشندوں اور ان کے قدرتی ماحول کے درمیان گہرے تعلق کو بھی اجاگر کرتی ہیں۔