’آپ کا 35 سالہ خاتون اسسٹنٹ سے کیا تعلق ہے؟‘ ٹرمپ سے سوال پر وائٹ ہاؤس سی سی این رپورٹر پر برہم
وائٹ ہاؤس نے پیر کے روز سی این این کی ایک رپورٹر کو اس وقت شدید تنقید کا نشانہ بنایا جب انہوں نے صدر ڈونلڈ ٹرمپ کے ایک معاون کے ساتھ تعلقات کے بارے میں سوال کیا۔
یہ خواتین صحافیوں پر حملوں کے سلسلے کا تازہ ترین واقعہ ہے۔
خبر رساں ادارے اے ایف پی کے مطابق اوول آفس میں ایک تقریب کے دوران رپورٹر کرسٹن ہومز نے 80 سالہ ٹرمپ سے کہا کہ وہ ڈیموکریٹ قانون ساز کے صدر کی 35 سالہ ایگزیکٹو اسسٹنٹ نٹالی ہارپ کے بارے میں کیے گئے تبصروں پر کیا کہیں گے؟
وائٹ ہاؤس کی ’ریپڈ رسپانس‘ ٹیم نے ہومز کو مخاطب کرتے ہوئے ایکس پر ایک پوسٹ میں کہا، ’کسی دن آپ کے بچے آپ کے اس گھناؤنے اور غیر انسانی سوال کو دیکھیں گے۔‘ پوسٹ کے ساتھ ٹرمپ کے جواب کی ویڈیو کا لنک بھی دیا گیا تھا۔
بعد ازاں ریپبلکن رہنما نے شمالی کوریا کے بارے میں سوال پوچھنے پر ہومز کو ’بہت بے عزت‘ قرار دیتے ہوئے سرزنش کی۔
یہ تقریب ایک نوعمر لائف گارڈ کو اعزاز دینے کے لیے منعقد کی گئی تھی جس نے تیز لہروں سے ایک بچے کو بچایا تھا، لیکن صدر نے حسبِ معمول غیر متعلقہ معاملات پر سوالات کے لیے بھی صحافیوں کو موقع دیا۔
ٹرمپ نے ہومز سے کہا، ’آپ بہت بلند آواز میں بولنے والی اور شور مچانے والی شخصیت ہیں، آپ فیک نیوز ہیں، خاموش رہیں۔‘
سی این این نے کہا کہ ہومز پر کیے گئے حملے ’عہدے کے شایانِ شان نہیں‘ تھے۔
ادارے نے ایک بیان میں کہا، ’ہم کرسٹن کے ساتھ مضبوطی سے کھڑے ہیں اور ان حملوں کو سخت ترین الفاظ میں مسترد کرتے ہیں۔‘
نٹالی ہارپ حالیہ دنوں میں انٹرنیٹ پر اس وقت تبصروں کا موضوع بن گئی جب یہ بات سامنے آئی ہے کہ جولائی میں ایئر فورس ون کے ایک خفیہ طیارہ تبدیل کرنے کے موقع پر وہ ٹرمپ کے ساتھ موجود چند معاونین میں شامل تھیں۔
ڈیموکریٹک سینیٹر اور 2028 کے ممکنہ صدارتی امیدوار جون اوسوف نے اتوار کو ایک انتخابی تقریر میں ٹرمپ پر الزام لگایا کہ وہ اپنا کام کرنے کے بجائے ’اپنا بال روم تعمیر کرنا اور نٹالی کے ساتھ سفر کرنا‘ چاہتے ہیں۔
ٹرمپ نے اوسوف کے اعتراضات کو مسترد کر دیا اور وائٹ ہاؤس میں 400 ملین ڈالر کی لاگت سے بال روم تعمیر کرنے کا دفاع کیا، تاہم انہوں نے اپنے معاون کا ذکر نہیں کیا۔
وائٹ ہاؤس نے لائف گارڈ کے ساتھ منعقدہ تقریب کے دوران ہارپ کے بارے میں سوال کرنے پر ہومز کو تنقید کا نشانہ بنایا۔
ریپڈ رسپانس اکاؤنٹ نے کہا، ’صدر اوول آفس میں ایک ہیرو لائف گارڈ کی میزبانی کر رہے ہیں اور وہ اس موقع کو صدر ٹرمپ کے عملے کے ایک رکن کے بارے میں سستی تنقید کرنے کے لیے استعمال کرتی ہیں۔‘ ’یہ گھٹیا لوگ انتہائی پست درجے کے ہیں۔‘
ہارپ، جو ماضی میں ٹیلی ویژن نیوز سے وابستہ رہی ہیں، اکثر ٹرمپ کے ساتھ نظر آتی ہیں اور انہیں صدر کو معلومات کے پرنٹ شدہ صفحات فراہم کرنے کی وجہ سے ’انسانی پرنٹر‘ کا لقب دیا گیا ہے۔
اس سال شائع ہونے والی کتاب ’ریجیم چینج‘ میں نیویارک ٹائمز کے دو رپورٹرز نے لکھا کہ ہارپ کی وفاداری اس حد تک تھی کہ وہ ٹرمپ کو ’تعریفی خطوط‘ لکھتی تھیں، جن میں سے ایک میں لکھا تھا: ’آپ ہی میرے لیے سب کچھ ہیں۔‘
