Sorry, you need to enable JavaScript to visit this website.

ریاض اور ابھا کے ایئرپورٹس پر حملوں میں تین افراد جان سے گئے، متعدد زخمی

منگل اور بدھ کو ابھا انٹرنیشنل ایئرپورٹ اور ریاض کے کنگ خالد انٹرنیشنل ایئرپورٹ کو نشانہ بنایا گیا (فائل فوٹو: ایس پی اے)
سعودی ایئرپورٹس پر ہونے والے دو حملوں میں دو خواتین سمیت تین افراد کی موت واقع ہوگئی۔ درجنوں افراد زخمی ہوئے ہیں جبکہ املاک کو بھی کچھ نقصان پہنچا۔
ایس پی اے کے مطابق سعودی جنرل اتھارٹی آف سول ایوی ایشن نے ایک بیان میں کہا کہ ’منگل اور بدھ کو ابھا انٹرنیشنل ایئرپورٹ اور ریاض کے کنگ خالد انٹرنیشنل ایئرپورٹ کو نشانہ بنایا گیا۔‘
ایمرجنسی ریسپانس ٹیم اور متعلقہ حکام نے فوری طور پر واقعات کے بعد طے شدہ طریقہ کار کے مطابق کارروائی کی۔
ابھا ایئرپورٹ پر منگل کو ہونے والے صریح حملے میں مراکش اور الجزائر سے تعلق رکھنے والی دو غیرملکی خواتین جان سے گئیں، جبکہ سعودی شہریوں سمیت 28 افراد زخمی ہوئے، جن میں سے بعض شدید زخمی ہیں۔ زخمیوں مییں بنگلہ دیش اور فلپائن کا ایک ایک شہری شامل ہے۔
ریاض کے کنگ خالد انٹرنیشنل ایئرپورٹ پر بدھ  کو کیے گئے حملے میں ایک سوڈانی شہری کی موت واقع ہوگئی۔ پانچ سعودی شہریوں سمیت 8 افراد زخمی ہوئے۔ دیگر زخمیوں میں دو مصری شہری اور ایک پاکستانی شامل ہے۔
 بیان میں کہا گیا کہ تمام زخمیوں کو طبی امداد کے لیے ہسپتال منتقل کیا گیا ہے۔
بیان میں مزید بتایا گیا کہ اتھارٹی متعلقہ حکام کے ساتھ مل کر نقصان کا تخمینہ لگانے اور مسافروں اور عملے کے تحفظ کو یقینی بنانے، مملکت کے سول ایوی ایشن سسٹم کی سکیورٹی کو برقرار رکھنے کے لیے ضروری اقدامات کر رہی ہے۔

میجر جنرل ترکی المالکی کے مطابق ’میزائل داغنے والے لانچنگ پلیٹ فارم کو صنعا میں تباہ کردیا گیا‘ (فائل فوٹو: ایس پی اے)

قبل ازیں بدھ کی صبح یمن میں قانونی حکومت کی خودمختاری  کی حمایت کرنے والے اتحاد کے مطابق سعودی فضائی دفاع نے ریاض کے شمال میں حوثیوں کا ایک بیلسٹک میزائل مار گرایا۔
اتحاد کے ترجمان میجر جنرل ترکی المالکی نے بعد میں تصدیق کی کہ  میزائل داغنے والے لانچنگ پلیٹ فارم کو یمن کے دارالحکومت صنعا میں تباہ کردیا گیا۔ عسکریت پسند مملکت کے خلاف ایک اور حملے کی تیاری کر رہے تھے۔
یاد رہے کہ ایران کے حمایت یافتہ حوثیوں کی اتحاد کی افواج کے ساتھ سٹریٹجک آبنائے باب المندب پر کنٹرول حاصل کرنے کے لیے لڑائی جاری ہے۔
یمن کی حکومت نے بدھ کی صبح بتایا کہ ’حوثی ملیشیا نے عدن کے بین الاقوامی ہوائی اڈے کو دو بیلسٹک میزائلوں سے نشانہ بنایا۔‘
اس سے قبل پیر کو سعودی عرب کے محکمۂ ہوا بازی نے کہا تھا کہ ’نجران اور جازان کے ہوائی اڈوں کو نشانہ بنایا گیا جس کے نتیجے میں تین افراد زخمی ہوئے۔‘

 

شیئر: