Sorry, you need to enable JavaScript to visit this website.

اے آئی کمپنی اینتھروپک سٹاک مارکیٹ میں آنے کو تیار، کمپنی سے متعلق پانچ اہم حقائق

پینٹاگون نے اینتھروپک سے مطالبہ کیا تھا کہ وہ اپنے چیٹ بوٹ ’کلاڈ‘ کے غیر محدود استعمال کی اجازت دے (فوٹو: گیٹی)
اوپن اے آئی سے الگ ہونے والے ایک گروپ نے پانچ سال قبل اینتھروپک کی بنیاد رکھی تھی۔ اب یہ کمپنی سٹاک مارکیٹ میں اپنے حصص فروخت کرنے کی تیاری کر رہی ہے۔ اِس کی ممکنہ شمولیت مصنوعی ذہانت کی طویل مدتی مالیاتی افادیت کا اب تک کا سب سے بڑا امتحان ثابت ہوگی۔
فرانسیسی خبر رساں ادارے اے ایف پی نے اپنی ایک رپورٹ میں چیٹ بوٹ ’کلاڈ‘ کے پیچھے موجود اِس کمپنی کے بارے میں پانچ اہم حقائق کا ذکر کیا ہے۔
اوپن اے آئی سے الگ ہونے والے افراد
اینتھروپک کی قیادت کرنے والے افراد نے مصنوعی ذہانت کی تیاری کا ہنر چیٹ جی پی ٹی بنانے والی کمپنی اوپن اے آئی میں سیکھا تھا جہاں وہ مصنوعی ذہانت کے تحفظ سے متعلق اپنے کام کی وجہ سے پہچانے جاتے تھے۔
ڈاریو اموڈی سال 2016 میں اُس وقت کے غیر منافع بخش ادارے اوپن اے آئی میں شامل ہوئے۔ اُنہوں نے وہاں مصنوعی ذہانت کے تحفظ پر کام کرنے والی ٹیم کے ساتھ ساتھ ایک ایسی ٹیم کی بھی سربراہی کی جو ’سکیلنگ لاز‘ کا مطالعہ کر رہی تھی۔ اِس اصطلاح سے مراد وہ اصول ہیں جو وضاحت کرتے ہیں کہ مصنوعی ذہانت کے ماڈلز کو جب زیادہ ڈیٹا فراہم کرکے تربیت دی جاتی ہے تو اُن کی صلاحیتوں میں کس طرح اضافہ ہوتا ہے۔
اُن کی چھوٹی بہن ڈینیلا اموڈی سال 2018 میں اوپن اے آئی سے وابستہ ہوئیں اور بعد ازاں تحفظ اور پالیسی کے شعبے کی نائب صدر بن گئیں۔
مصنوعی ذہانت کی تیاری کے طریقۂ کار پر اوپن اے آئی کی قیادت سے اختلافات کے بعد دونوں بہن بھائیوں اور اِن کے کئی ساتھیوں نے دسمبر 2020 میں کمپنی چھوڑ دی۔ اِس کے محض چار ہفتے بعد اِنہوں نے اینتھروپک قائم کر لی۔

اینتھروپک کے چیف ایگزیکٹو ڈاریو اموڈی اور کمپنی کی صدر ڈینیلا اموڈی کی پرورش سان فرانسسکو میں ہوئی (فوٹو: اے ایف پی)

سان فرانسسکو میں قائم اِن دونوں کمپنیوں کے درمیان تلخ مسابقت کا سلسلہ اُس وقت سے جاری ہے۔
بہن بھائی اور ایک ہی گھر میں رہنے والے ساتھی
اینتھروپک کے چیف ایگزیکٹو ڈاریو اموڈی اور کمپنی کی صدر ڈینیلا اموڈی کی پرورش سان فرانسسکو کے علاقے ’مشن ڈسٹرکٹ‘ میں ہوئی۔ اِن کے والد چمڑے کا کام کرنے والے ہنرمند تھے، جب کہ اُن کی والدہ عوامی کتب خانوں کی تعمیر و مرمت کے منصوبوں کی نگرانی کرتی تھیں۔
نیویارک ٹائمز کے مطابق، اینتھروپک کے دو دیگر شریکِ بانی بھی اوپن اے آئی میں شمولیت سے پہلے سان فرانسسکو میں اموڈی بہن بھائیوں کے ساتھ ایک ہی گھر میں رہتے تھے۔ اِن میں ماہرِ طبیعیات جیرڈ کپلن شامل ہیں، جو اب کمپنی کے چیف سائنٹفک آفیسر ہیں، جبکہ دوسرے کرس اولا ہیں، جو ایک محقق ہیں۔ ڈاریو اموڈی ماضی میں انہیں ریاضی کی تعلیم بھی دے چکے ہیں۔
باقی تین شریک بانیوں کا تعلق بھی اوپن اے آئی سے تھا۔
سیم میک کینڈلش اینتھروپک کے چیف آرکیٹیکٹ ہیں۔ وہ اِس سے قبل کمپنی کے چیف ٹیکنالوجی آفیسر رہ چکے ہیں۔

اینتھروپک کی بنیاد اوپن اے آئی سے الگ ہونے والے ایک گروپ نے پانچ سال قبل رکھی (فوٹو: روئٹرز)

ٹام براؤن کمپنی کے کمپیوٹنگ انفراسٹرکچر کی نگرانی کرتے ہیں۔ وہ اوپن اے آئی کے ابتدائی 20 ملازمین میں شامل تھے۔
جیک کلارک کمپنی کے عوامی فلاح و بہبود سے متعلق کام کی سربراہی کرتے ہیں اور اُنہوں نے اینتھروپک انسٹی ٹیوٹ کی بنیاد رکھی، جو کمپنی کے اندر ایک تحقیقی ادارے کے طور پر کام کرتا ہے۔ وہ ماضی میں ٹیکنالوجی کے شعبے کے صحافی تھے اور سال 2016 میں اوپن اے آئی میں شامل ہوئے تھے۔
عقلیت پسندی اور مؤثر فلاحی سرگرمیوں کے حامی
ڈاریو اموڈی کی فکری تشکیل میں دو باہم مربوط تحریکوں نے اہم کردار ادا کیا۔
پہلی تحریک ’عقلیت پسندی‘ ہے، جس کا تعلق مصنوعی ذہانت کے معروف مفکر ایلیعزر یودکووسکی سے جوڑا جاتا ہے۔ اِس تحریک کے حامیوں کا خیال ہے کہ مصنوعی ذہانت اس قدر طاقت ور ہو سکتی ہے کہ انسانی معاشرے کی تباہی کا سبب بن جائے۔

صدر ٹرمپ نے وفاقی اداروں کو یہ حکم دیا تھا کہ وہ اینتھروپک کی ٹیکنالوجی کا استعمال بند کر دیں (فوٹو: اے ایف پی)

دوسری تحریک ’فلاحی سرگرمیوں میں سے زیادہ سے زیادہ افادیت‘ (Effective Altruism) کہلاتی ہے۔ اِس کا مقصد فلاحی کاموں اور خیرات کے لیے دی جانے والی رقوم کو زیادہ سے زیادہ مؤثر انداز میں استعمال کرنا ہے، تاکہ کم سے کم وسائل سے زیادہ سے زیادہ فائدہ حاصل کیا جا سکے۔
اِس تحریک سے وابستہ افراد نے اینتھروپک کو اِس کے ابتدائی دور میں مالی معاونت بھی فراہم کی۔ فیس بک کے شریک بانی ڈسٹن موسکووٹز اور سکائپ کے شریک بانی جان ٹالن نے کمپنی کی پہلی سرمایہ کاری کی مہم میں سرمایہ لگایا تھا۔
سام بینک مین فرائیڈ نے اپنی کمپنی ایف ٹی ایکس کے ذریعے اینتھروپک میں 50 کروڑ ڈالر کی سرمایہ کاری کی تھی۔ اِس سرمایہ کاری کے بدلے انہیں ایسے حصص ملے تھے جن کے ساتھ ووٹ دینے کا حق حاصل نہیں تھا۔
بعد ازاں ایف ٹی ایکس دیوالیہ ہو گئی اور بینک مین فرائیڈ کو جیل بھیج دیا گیا۔ اِس کے بعد اِن حصص کو 88 کروڑ 40 لاکھ ڈالر میں فروخت کر دیا گیا تاکہ ایکسچینج کے صارفین کی رقم واپس کی جا سکے۔
اموڈی نے سال 2023 میں کہا تھا کہ وہ اگرچہ اِس تحریک کے کچھ نظریات سے متفق ہیں لیکن وہ خود کو اِس کا حصہ تصور نہیں کرتے۔
تاہم، میٹا کے مارک زکربرگ اور اینویڈیا کے جینسن ہوانگ سمیت ناقدین نے انہیں ’ڈومر‘ قرار دیا ہے۔ یہ اصطلاح ایسے افراد کے لیے استعمال ہوتی ہے جو مستقبل کے بارے میں انتہائی مایوس کن اور تباہ کن خدشات رکھتے ہیں۔
بڑی ٹیکنالوجی کمپنیاں اور بڑے سرمایہ کار
اینتھروپک کی جانب سے سٹاک مارکیٹ میں شمولیت کے لیے جمع کرائی گئی دستاویزات سے ظاہر ہوتا ہے کہ اِس کے سب سے بڑے سرمایہ کاروں میں ایمیزون اور گوگل کی سرپرست کمپنی الفابیٹ شامل ہیں۔

اینتھروپک اِس وقت سٹاک مارکیٹ میں اپنے حصص فروخت کرنے کی تیاری کر رہی ہے (فوٹو: برینڈ سنیریو)

دیگر سرمایہ کاروں میں پیٹر تھیل کی قائم کردہ انویسٹمنٹ کمپنی ’فاؤنڈرز فنڈ‘ کے علاوہ مائیکروسافٹ اور اینویڈیا بھی شامل ہیں۔
مئی میں اینتھروپک نے 65 ارب ڈالر کی نئی سرمایہ کاری حاصل کی، جس کے نتیجے میں کمپنی کی مجموعی مالیت کا تخمینہ 965 ارب ڈالر تک پہنچ گیا۔ یوں پہلی مرتبہ اس کی مالیت اوپن اے آئی سے زیادہ ہو گئی۔
گوگل کے سابق چیف ایگزیکٹو ایرک شمٹ بھی اینتھروپک کے ابتدائی بیرونی سرمایہ کاروں میں شامل ہیں۔ انہوں نے سال 2021 میں کمپنی کی پہلی سرمایہ کاری مہم کے دوران اِس میں کروڑوں ڈالر کی سرمایہ کاری کی تھی۔
پینٹاگون کے ساتھ تنازع
جنوری میں امریکی صدر ڈونلڈ ٹرمپ کی انتظامیہ کے تحت پینٹاگون نے اینتھروپک سے مطالبہ کیا کہ وہ اپنے چیٹ بوٹ ’کلاڈ‘ کے غیر محدود استعمال کی اجازت دے۔
تاہم، اینتھروپک نے دو مخصوص مقاصد کے لیے اپنی ٹیکنالوجی کے استعمال کی اجازت دینے سے انکار کر دیا۔ یہ مقاصد امریکہ کے اندر شہریوں کی بڑے پیمانے پر نگرانی اور خودکار مہلک ہتھیاروں کا استعمال تھے، جنہیں انسان کے براہِ راست کنٹرول کے بغیر ہدف کو نشانہ بنانے کے لیے استعمال کیا جا سکتا ہے۔

وزیر دفاع پیٹ ہیگستھ نے اینتھروپک کو سپلائی چین کے لیے خطرہ قرار دینے کی ہدایت جاری کی (فوٹو: روئٹرز)

فروری میں صدر ٹرمپ نے اِس انکار پر سخت برہمی کا اظہار کرتے ہوئے وفاقی اداروں کو حکم دیا کہ وہ اینتھروپک کی ٹیکنالوجی کا استعمال بند کر دیں۔
اِس کے بعد وزیر دفاع پیٹ ہیگستھ نے ہدایت جاری کی کہ اینتھروپک کو ’سپلائی چین کے لیے خطرہ‘ قرار دیا جائے۔ یہ درجہ بندی عام طور پر امریکہ کے مخالف غیر ملکی عناصر یا اداروں کے لیے استعمال کی جاتی ہے۔
ستمبر میں امریکی محکمۂ دفاع نے سوشل میڈیا پر ایک بیان جاری کیا، جس میں کہا گیا تھا کہ ’مؤثر فلاحی سرگرمیاں نہیں بلکہ امریکی قوم پرستی۔‘

شیئر: