پی ڈی ایم نے جلسوں پر پابندی کا فیصلہ مسترد کر دیا

پاکستان ڈیموکریٹک موومنٹ کے سربراہ مولانا فضل الرحمان نے کہا ہے کہ حکومت کی جانب سے کورونا کی آڑ میں جلسوں پر پابندی عائد کرنے کے فیصلے کو مسترد کرتے ہیں اور اپوزیشن اتحاد کی تحریک میں اب مزید تیزی آئے گی۔

اسلام آباد میں پی ڈی ایم کے سربراہ اجلاس کے بعد میڈیا سے گفتگو کرتے ہوئے مولانا فضل الرحمان نے کہا کہ ’ پی ڈی ایم کے جلسے شیڈول کے مطابق ہوں گے اور تحریک میں مزید تیزی آئے گی۔‘

انہوں نے مزید کہا کہ ’سلیکٹڈ حکومت کو گھر بھجوانے تک چین سے نہیں بیٹھیں گے اور عوام کو ان کا جمہوری حق دلوا کر رہیں گے۔‘

منگل کو پی ڈی ایم اجلاس کے بعد مسلم لیگ ن کی نائب صدر مریم نواز نے صحافیوں سے گفتگو کرتے ہوئے کہا کہ ’آئی ایس پی آر کی ایک پریس ریلیز میں بتایا جا رہا ہے کہ چند افسران جذبات میں آ کر ایکشن لیتے ہیں اس سے تو یہی پیغام دیا جا رہا ہے کہ وہاں بھی سب ایک پیج پر نہیں ہیں۔‘

انہوں نے ایک بار پھر الزام عائد کیا کہ گلگت بلتستان میں سلیکیٹرز نے سیلکٹڈ کے ساتھ مل کر دھاندلی کی اور مسلم لیگ ن کے لوگ توڑے۔

مریم نواز کا کہنا تھا کہ ’اپوزیشن کی تمام جماعتوں کی پالیسی ایک ہے کسی کا لہجہ سخت اور کوئی نرم زبان استعمال کرتا ہے لیکن پالیسی ایک ہی ہے۔‘

 اجلاس کے بعد سابق وزیر اعظم شاہد خاقان عباسی نے اردو نیوز سے گفتگو کرتے ہوئے کہا ’وزیر اعظم کی جانب سے سینیٹ کے الیکشن کے حوالے سے ترمیم میں حمایت کرنے کے حوالے سے مشاورت کی جائے گی اور جب آئینی ترمیم کا مسودہ سامنے آئے گا تو ہی اپوزیشن کوئی فیصلہ کر پائے گی۔‘

 تاہم اس حوالے سے مولانا فضل الرحمن کا کہنا تھا کہ ’جعلی حکومت سے قانون سازی کے لیے کسی صورت مذاکرات نہیں کریں گے۔‘

پی ڈی ایم کے سربراہی اجلاس میں اپوزیشن اتحاد نے میثاق پاکستان متعارف کرنے کا فیصلہ کرتے ہوئے پانچ رکنی کمیٹی بھی قائم کر دی ہے۔

پانچ رکنی کمیٹی ’میثاق پاکستان‘ کے مجوزات کو حتمی شکل دے گی جس کے تحت اپوزیشن اتحاد آئندہ کی حکمت عملی مرتب کرے گا۔

اجلاس سے سابق وزیر اعظم نوازشریف نے ویڈیو لنک کے ذریعے خطاب کرنا تھا لیکن طبیعت کی ناسازی کے باعث سابق وزیر اعظم نے اجلاس میں شرکت نہ کرسکے۔

مریم نواز نے اپنے ٹوئٹر پیغام میں کہا کہ ’گردے میں تکلیف کے باعث نواز شریف پی ڈی ایم اجلاس میں شرکت نہ کر سکے اور ان کی نمائندگی میں خود کر رہی ہوں۔‘

پیپلز پارٹی کے چیئرمین بلاول بھٹو زرداری نے گلگت سے ویڈیو لنک کے ذریعے اجلاس میں شرکت کی۔

میثاق پاکستان کے نکات

‏میثاق پاکستان کے نکات میں وفاقی، اسلامی، جمہوری، پارلیمانی آئین پاکستان کی بالادستی اور عمل داری یقینی بنانا جبکہ پارلیمنٹ کی خود مختاری شامل ہے۔ 

 سیاست سے اسٹیبلشمنٹ اور انٹیلی جنس اداروں کے کردار کا خاتمہ،  آزاد عدلیہ کا قیام آزادانہ، غیرجانبدارانہ اور منصفانہ انتخابات کے لیےاصلاحات اور انعقاد شامل ہیں۔ 

میثاق پاکستان کے اعلامیے میں عوام کے بنیادی انسانی اور جمہوری حقوق کا تحفظ، صوبوں کے حقوق اور اٹھارویں ترمیم کا تحفظ ، مقامی حکومتوں کا موثر نظام، اظہار رائے اور میڈیا کی آزادی کا دفاع، انتہا پسندی اور دہشت گردی کا خاتمہ، مہنگائی بے روزگاری، غربت کے خاتمے کے لیے ہنگامی معاشی پلان اور آئین کی اسلامی شقوں کا تحفظ اور عمل درآمد یقینی بنانا شامل ہے۔