’بے بنیاد اطلاع پر سیریز کی منسوخی، کیا آپ کو فیصلے کے نتائج کا اندازہ ہے؟‘

دورہ پاکستان پر موجود نیوزی لینڈ کی ٹیم کی جانب سے پہلے ایک روزہ میچ سے چند لمحے قبل دورہ منسوخ کرنے کی اطلاع پر پاکستان کے سابقہ اور موجودہ کرکٹرز نے ملے جلے ردعمل کا اظہار کیا ہے۔

پاکستان کرکٹ ٹیم کے سابق کپتان شاہد آفریدی نے سیریز کی منسوخی پر تبصرہ کرتے ہوئے کہا کہ ’ایک بے بنیاد اطلاع پر تمام تر یقین دہانیوں کے باوجود آپ نے سیریز منسوخ کر دی۔ کیا آپ کو اپنے فیصلے کے نتائج کا اندازہ ہے؟‘

پاکستان کرکٹ ٹیم کے سابق کپتان جاوید میانداد نے کہا ہے کہ نیوزی لینڈ نے اپنے کھلاڑیوں کی سکیورٹی کی وجہ سے پاکستان کے ساتھ سیریز منسوخ کی ہے اور اس سلسلے میں انٹرنیشنل کرکٹ کونسل (آئی سی سی) کوئی کردار ادا نہیں کر سکتی۔

 اردو نیوز سے گفتگو کرتے ہوئے جاوید میانداد کا کہنا تھا کہ نیوزی لینڈ، انگلینڈ کا بورڈ نہیں بلکہ کھلاڑی مضبوط ہیں اور وہاں کی حکومت کبھی بھی کھلاڑیوں کی جانوں کا خطرہ مول نہیں لے سکتی۔

 انہوں نے کہا کہ ’آئی سی سی کیا کرتی ہے کسی کو کچھ پتہ نہیں۔ یہ دونوں کرکٹ بورڈ ایک دوسرے کے ساتھ کر سکتے ہیں کہ اگر آپ نہیں کھیلیں گے تو ہم بھی نہیں کھیلیں گے۔‘

جاوید میانداد کا کہنا تھا کہ نیوزی لینڈ بورڈ اگر یہ فیصلہ نہ کرتا تو ان کے لیے مشکلات پیش آ سکتی تھیں کیونکہ ان کے کھلاڑی بہت مضبوط ہیں اور ان کے خاندان اس پر احتجاج کرتے۔ 

’اگر کھلاڑی نہیں کھیلتے تو ان کا بورڈ کچھ نہیں کر سکتا۔‘

  ان کا کہنا تھا کہ پاکستان کرکٹ بورڈ کو نیوزی لیند کے خدشات دور کرنے کے لیے ان سے بات کرنا چاہیے اور ان کو بتائے کہ ہم نے فول پروف سکیورٹی کا بندوبست کیا ہے اور ان کے کھلاڑیوں کو یہاں کوئی خطرہ نہیں ہو گا۔

سابق فاسٹ بولر شعیب اختر کا کہنا تھا کہ ’نیوزی لینڈ نے پاکستان کرکٹ کو قتل کردیا ہے۔‘