امارات کے صدر محمد بن زاید کا دورہ مصر

متحدہ عرب امارات کے صدر شیخ محمد بن زاید آل نہیان اور مصری صدرعبدالفتاح السیسی نے اتوار کو مصری شہر العلمین میں مذاکرات کیے ہیں۔

دونوں رہنماوں نے برادرانہ تعلقات کو مزید مضبوط بنانے کے طریقوں پر بات چیت کی۔

الامارات الیوم کے مطابق امارات کے صدر شیخ محمد بن زاید آل نہیان اتوار کو مصر کے دورے پرالعلمین پہنچے تھے۔ مصری صدر عبدالفتاح السیسی نے پرتپاک خیر مقدم کیا۔

امارات اور مصر کے صدور نے دوستانہ ماحول میں بات چیت کی۔ باہمی تعاون کو عروج کی نئی منزلوں تک لے جانے، سٹراٹیجک شراکت کے استحکام کے لیے تعاون کے نئے راستے تلاش کرنے اور نئے امکانات پر اتفاق رائے  پیدا کرنے کے لیے تبادلہ خیال کیا۔  

ملاقات میں اقتصادی و ترقیاتی شعبوں میں سٹراٹیجک شراکت کو مزید مضبوط بنانے اور دونوں برادر ملکوں کے عوام کی پائدار ترقی اور خوشحالی کے لیے ضروری اقدامات پر زور دیا گیا۔

دونوں رہنماؤں نے باہمی دلچسپی کے متعدد امور اور مسائل  پر نقطہ ہائے نظر کا تبادلہ  کیا۔ علاقائی و عالمی حالات حاضرہ بھی زیر بحث آئے۔ 

ملاقات میں کہا گیا کہ بحرانوں اور جھگڑوں کو پرامن وسائل کے ذریعے طے کرنے کے لیے سفارتکاری، افہام و تفہیم اور مکالمے کا سہارا لیا جانا ضروری ہے۔ پرامن وسائل ہی عالمی امن وسلامتی کے تحفظ کے ضامن ہیں۔

دونوں رہنماؤں نے عرب دنیا کو درپیش چیلنجوں سے نمٹنے کے سلسلے میں عرب اتحاد و اتفاق اور مشترکہ عرب جدوجہد میں استحکام کو ناگزیر قراردیا۔ 

 اس عزم کا اظہار کیا  گیاکہ خطے کے بحرانوں کے پائدار حل تک رسائی کی ہر کوشش کا ساتھ دیا جانا ضروری ہے اور اس حوالے سے دونوں ملک پوری طرح سے متفق ہیں۔اس سے خطے کے ملکوں میں امن و استحکام کی جڑیں مضبوط ہوں گی اور امن و خوشحالی کو فروغ ملے گا۔