وزارت سیاحت سعودی عرب نے ’سمر پروگرام‘ کے دوران سیاحت کے شعبے میں ریکارڈ کامیابی کا اعلان کرتے ہوئے بتایا کہ مملکت بھر میں مختلف سیاحتی مقامات پر اندرون و بیرون مملکت سے آنے والے سیاحوں کی تعداد 32 ملین سے تجاوز کر گئی جو کہ گزشتہ سال کے مقابلے میں 26 فیصد زیادہ ہے۔
سعودی خبررساں ادارے ’ایس پی اے‘ کے مطابق وزارت سیاحت کا کہنا ہے کہ ملکی اور غیرملکی سیاحوں کی جانب سے مجموعی طور پر 53.2 ارب ریال خرچ کیے گئے جو گزشتہ سال کے موسم گرما کے مقابلے میں 15 فیصد زیادہ ہیں۔
وزارت کا کہنا ہے کہ مملکت کے جنوبی علاقے عسیر نے خلیجی تعاون کونسل (جی سی سی) کے ممالک سے آنے والے سیاحوں کی تعداد میں 49 فیصد اضافہ ریکارڈ کیا۔
صيفٌ استثنائي شهدته وجهات السياحة في المملكة حيث بلغ إجمالي عدد السياح من الداخل والخارج أكثر من 32 مليون خلال موسم الصيف هذا العام. #نجاح_صيف_السعودية pic.twitter.com/CLj5qaYgbX
— وزارة السياحة (@Saudi_MT) September 11, 2025
سعودی وزیر سیاحت احمد الخطیب نے جون میں ’سعودی سمر‘ پروگرام کا افتتاح ایک ورکشاپ کے دوران کیا تھا جس کا عنوان ’اپنے موسم گرما کو رنگین بنائیں‘ رکھا گیا تھا اس پروگرام کے تحت جدہ، بحیرہ احمر، طائف، الباحہ اور عسیر سمیت 6 مختلف مقامات کو فروغ دیا گیا۔
پروگرام کی نمایاں سرگرمیوں میں ای سپورٹس ورلڈ کپ اور جدہ و عسیر سیزن شامل تھے جنہوں نے لاکھوں مقامی و غیرملکی سیاحوں کو متوجہ کیا۔
وزارت سیاحت نے کہا ہے کہ سیاحتی سرگرمیوں کو سال بھر جاری رکھنے کے لیے اقدامات کیے جارہے ہیں اور اس وقت سعودی ونٹر سیمن کی تیاریاں کی جاری ہیں جس میں مزید عالمی تقریبات اور سیاحتی تجربات شامل ہوں گے۔
