یمن: اسرائیلی فضائی حملے میں حوثیوں کے چیف آف سٹاف میجر جنرل عبدالکریم الغماری ہلاک

اسرائیل کے فضائی حملے میں یمن کے حوثیوں کے چیف آف سٹاف اور گروپ کی اہم ترین فوجی شخصیات میں سے ایک میجر جنرل محمد عبدالکریم الغماری ہلاک ہوگئے ہیں۔
عرب نیوز کے مطابق حوثیوں نے جمعرات کو اسرائیلی فضائی حملے کے بعد میجر جنرل محمد عبدالکریم الغماری کے مارے جانے کی تصدیق کی ہے۔
حوثیوں کی خبر رساں ایجنسی ’صبا‘ کے مطابق اسرائیلی حملے میں چیف آف سٹاف کے کئی ساتھیوں سمیت اُن کے 13 سال کے بیٹے حسین کے ہلاک ہونے کی بھی اطلاع ہے۔ 

اس سے قبل اس حملے میں میجر جنرل محمد عبدالکریم الغماری کے زخمی ہونے کی اطلاع آئی تھی، تاہم بعدازاں جمعرات کو گروپ کی جانب سے جاری سرکاری بیان میں اُن کے ہلاک ہونے کی تصدیق کر دی گئی۔
اسرائیلی حکام نے جون میں یہ دعویٰ کیا تھا کہ ’میجر جنرل محمد عبدالکریم الغماری کو ایک فضائی حملے میں نشانہ بنایا گیا ہے۔‘
یاد رہے کہ رواں برس اگست میں یمن کے حوثیوں کے وزیراعظم احمد غالب نصر الرحاوی بھی اپنے کئی ساتھیوں سمیت اسرائیل کے ایک فضائی حملے میں ہلاک ہو گئے تھے۔
ایران کے حمایت یافتہ عسکریت پسند حوثی باغیوں نے سنیچر 30 اگست کو ایک بیان میں انکشاف کیا تھا کہ ان کے وزیراعظم رواں ہفتے کے آغاز میں مارے گئے تھے۔
حوثیوں کی جانب سے احمد غالب نصر الرحاوی کو گذشتہ برس وزیراعظم مقرر کیا گیا تھا، وہ غزہ کی جنگ شروع ہونے کے بعد سے اسرائیل کے مسلسل فضائی حملوں میں ہلاک ہونے والے اعلٰی ترین عہدے پر فائز شخصیت تھے۔
واضح رہے کہ اکتوبر 2023 میں غزہ میں اسرائیل کی فوجی اور فلسطینیوں کی نسل کشی کی کارروائیاں شروع ہونے کے بعد یمن کے حوثیوں نے اسرائیلی اہداف پر حملوں میں اضافہ کر دیا تھا۔ 
حوثی اسرائیل کے خلاف اپنے حملوں کو فلسطینیوں کے ساتھ اظہار یکجہتی کے طور پر منسوب کرتے ہیں۔ اس کے جواب میں اسرائیل بھی یمن میں حوثیوں کے زیرقبضہ علاقوں پر متعدد فضائی حملے کر چکا ہے جس سے علاقائی تنازع شدت اختیار کر گیا ہے۔