پاکستان میں حکومت نے پیٹرولیم مصنوعات کی قیمتوں میں ردوبدل کا اعلان کیا ہے۔
سنیچر کی رات خزانہ ڈویژن کی جانب سے پیٹرولیم مصنوعات کی قیمتوں میں ردوبدل کا نوٹی فیکیشن جاری کیا گیا۔
نوٹی فیکیشن کے مطابق ’ہائی سپیڈ ڈیزل کی قیمت میں 6 روپے فی لیٹر اضافہ کیا گیا ہے جس کے بعد یہ فی لیٹر 284 روپے 44 پیسے کے حساب سے فروخت کیا جا رہا ہے۔‘
اس سے قبل ہائی سپیڈ ڈیزل کی فی لیٹر 278 روپے 44 پیسے مقرر تھی۔
نوٹی فیکیشن کے مطابق پیٹرول کی قیمت میں کوئی تبدیلی نہیں کی گئی اور اس کی فروخت بدستور فی لیٹر 265 روپے 45 پیسے کے حساب سے جاری رہے گی۔
خزانہ ڈویژن کے نوٹی فیکیشن میں کہا گیا ہے پیٹرولیم مصنوعات کی نئی قیمتوں کا اطلاق سنیچر اور اتوار کی درمیانی رات 12 بجے سے ہو گیا ہے اور یہ قیمتیں آئندہ 15 روز کے لیے برقرار رہیں گی۔
اوگرا کے حکام کا کہنا ہے کہ ’پیٹرولیم مصنوعات کی قیمتوں میں ردوبدل عالمی مارکیٹ میں اُتار چڑھاؤ کو مدنظر رکھ کر کیا گیا ہے۔‘
