نئی ٹیموں کی بولی سے کچھ ہی دیر پہلے علی ترین کا نیلامی میں شامل نہ ہونے کا اعلان

پاکستان سپر لیگ (پی ایس ایل) کی ٹیم ملتان سلطانز کے سابق مالک علی خان ترین نے پی ایس ایل کی دو نئی ٹیموں کی نیلامی میں شامل نہ ہونے کا فیصلہ کیا ہے۔

یہ پیش رفت جمعرات کو ایک ایسے وقت میں سامنے آئی ہے جب پی ایس ایل میں دو نئی فرنچائزز کی شمولیت کے لیے نیلامی کی تقریب کے آغاز میں چند ہی منٹس باقی تھے۔

سوشل میڈیا پلیٹ فارم ایکس پر جاری اپنے بیان میں علی خان ترین نے کہا کہ ’غور و فکر کے بعد، میرے خاندان اور میں نے یہ فیصلہ کیا ہے کہ ہم آج ہونے والے پی ایس ایل فرنچائز آکشن میں حصہ نہیں لیں گے۔‘

انہوں نے کہا کہ ملتان سلطانز کے ساتھ ان کا وقت محض ایک کرکٹ ٹیم کی ملکیت تک محدود نہیں تھا بلکہ یہ جنوبی پنجاب کے لیے آواز بلند کرنے کا ذریعہ تھا۔

ان کے مطابق ’یہ سفر صرف ایک ٹیم کے بارے میں نہیں تھا بلکہ جنوبی پنجاب کے بارے میں تھا، ایک ایسے خطے کو آواز دینے کے لیے جسے طویل عرصے سے نظرانداز کیا جاتا رہا۔ ہم نے جو کچھ بھی بنایا، اسی سوچ کے تحت بنایا۔‘

علی خان ترین نے مزید کہا کہ اگر وہ مستقبل میں پی ایس ایل میں واپسی کریں گے تو اس کی وجہ بھی یہی ہوگی۔ ’اگر میں دوبارہ پی ایس ایل میں آیا تو وہ بھی اسی مقصد کے لیے ہوگا۔ جنوبی پنجاب میرے دل کے قریب ہے، یہی میرا گھر ہے۔‘

انہوں نے واضح کیا کہ رواں سال وہ پی ایس ایل کو بطور تماشائی دیکھیں گے۔ ’اس سال میں سٹیڈیم میں بیٹھ کر کھلاڑیوں کی حوصلہ افزائی کروں گا اور شائقین کے ساتھ خوشی مناؤں گا۔‘

اپنے بیان کے اختتام پر علی خان ترین نے کہا کہ ’اور جب ملتان کی ٹیم فروخت کے لیے آئے گی، ہم تیار ہوں گے۔ تمام بولی دہندگان کے لیے نیک تمنائیں، اللہ کرے سب سے زیادہ بےباک مالک کامیاب ہو۔‘

یاد رہے کہ پی ایس ایل میں دو نئی ٹیموں کی شمولیت کے لیے آج (جمعرات) کو شام چار بجے اسلام آباد میں نیلامی کی تقریب شیڈول ہے۔

اس سے پہلے پی ایس ایل انتظامیہ کے ساتھ تنازعے کی وجہ سے علی خان ترین ملتان سلطانز سے علیحدہ ہو گئے تھے۔