وراٹ کوہلی کو مل گیا اپنا ’چھوٹا چیکو‘، ننھا ہم شکل سوشل میڈیا پر وائرل

انڈین سٹار بلے باز وراٹ کوہلی کے ہم شکل نوجوانوں کی تصاویر اکثر سوشل میڈیا پر سامنے آتی رہتی ہیں مگر اس بار صورت حال کچھ مختلف ہے۔

اس مرتبہ کوئی نوجوان نہیں بلکہ ایک ننھا سا بچہ سوشل میڈیا صارفین کی توجہ کا مرکز بنا ہوا ہے۔

یہ واقعہ اس وقت سامنے آیا جب وڈودرا میں نیوزی لینڈ کے خلاف ایک روزہ میچ سے قبل وراٹ کوہلی کی ایک تصویر سوشل میڈیا پر وائرل ہوئی۔ 
تصویر میں کوہلی ایک بچے کے ساتھ نظر آ رہے ہیں، جس کی معصوم شکل نے مداحوں کے دل جیت لیے۔

بعدازاں معلوم ہوا کہ اس ننھے ہم شکل کا نام ’گرَوِت اُتم‘ ہے جو بنیادی طور پر ہریانہ کے شہر پنچکولا سے تعلق رکھتا ہے۔ 

’ابھی آتا ہوں‘، گرَوِت کی یادگار ملاقات

ایک حالیہ انٹرویو میں گرَوِت نے بتایا کہ ’جیسے ہی وراٹ کوہلی کی نظر مجھ پر پڑی وہ مسکرا دیے اور انہں ’چھوٹا چیکو کہہ کر پکارا۔‘
گرَوِت نے کہا کہ وہ اس وقت سٹینڈز میں زور زور سے ’وراٹ، وراٹ‘ کے نعرے لگا رہا تھا کہ کوہلی نے اس کو دیکھ لیا اور ہاتھ کے اشارے سے کہا کہ ’ابھی آتا ہوں‘۔ کچھ ہی دیر بعد وہ واقعی اس کے پاس پہنچ گئے۔  
گرَوِت نے بتایا کہ وراٹ نے قریب کھڑے انڈین ٹیم کے کپتان روہت شرما کو بھی بلایا اور ہنستے ہوئے کہا، ’اُدھر دیکھو، میرا ڈپلیکیٹ بیٹھا ہے۔‘

واضح رہے کہ کرکٹ کے حلقوں میں وراٹ کوہلی کو ان کے بچپن کے نک نیم ’چیکو‘ سے جانا جاتا ہے، جو اب انہوں نے گرَوِت کو بھی دے دیا ہے۔
انسٹاگرام پر پوسٹ کی گئی ایک ویڈیو میں گرَوِت نے بتایا کہ وہ بھی خود ایک کرکٹر ہیں اور کوہلی ان کے پسیدہ کھلاڑی ہیں جبکہ وہ خود بھی ان کی طرح دائیں ہاتھ سے بلے بازی کرتے ہیں۔
واضح رہے کہ اس سے قبل بھی انٹرنیٹ پر کوہلی کے ہم ‌شکل سامنے آتے رہے ہیں جو بہت مقبول ہوئے ہیں۔