’موسیقی کی سرحد نہیں‘، گلوکار عمران خان کی سدھو موسے والا کے والدین سے ملاقات

پاکستانی نژاد ڈچ گلوکار عمران خان نے انڈیا کے مشہور پنجابی گلوکار سدھو موسے والا کے ضلع مانسا میں واقع آبائی گاؤں میں ان کے والدین سے ملاقات کی۔

پاکستانی نژاد اور ڈچ گلوکار عمران خان ’ایمپلی فائر‘، ’چیونگ گم چبا کے‘ سمیت دیگر گانوں کی وجہ سے خاصی شہرت رکھتے ہیں۔ انہوں نے اپنے انسٹاگرام پر ایک تصویر شیئر کی جس میں وہ سدھو موسے والا کے کم سن بھائی شبھدیپ سنگھ سدھو کو گود میں اٹھائے نظر آتے ہیں۔

عمران خان کا یہ دورہ ’چھوٹے سدھو‘ کی پیدائش کے بعد کیا گیا ہے، جس سے قبل گورداس مان، گل راؤنٹا، جسوندر برار اور ہوبی ڈھالیوال سمیت کئی معروف شخصیات خاندان سے اظہارِ یکجہتی کے لیے ان کے گھر جا چکی ہیں۔

دوسری جانب سوشل میڈیا پر گلوکار کو سدھو موسے والا کے خاندان کے ساتھ کھڑے ہونے اور جذباتی خراجِ عقیدت پیش کرنے پر سراہا جا رہا ہے۔

صارفین اس دورے کی تعریف کرتے ہوئے نظر آ رہے ہیں۔
انسٹاگرام پر ایک صارف سونو بدو نے تصویر کے کمنٹس میں لکھا ہے کہ ’ بھائی، یقین نہیں آ رہا ہے کہ اتنا بڑا گلوکار سدھو کے گھر میں موجود ہے۔ جبکہ نو دیپ شرما لکھا ہے ’موسیقی کی کوئی سرحد نہیں۔‘

کئی صارفین ’چھوٹے سدھو‘ کی شکل و صورت کا موازنہ سدھو موسے والا سے کر رہے ہیں اور انہیں ایسا لگ رہا ہے کہ ’سدھو واپس آ گیا ہے۔‘ جبکہ ایک صارف نے سدھو موسے والا کے مشہور گانے کا حوالہ دیتے ہوئے لکھا ہے ’دل دا نئیں ماڑا۔۔۔ تیرا سدھو موسے والا۔‘