مشہور فیشن برانڈ ’شینائل‘ کے بغیر تلوے والے جُوتے جن کی قیمت 4 لاکھ 18 ہزار ہے

مشہور فیشن برینڈ ’شینائل‘ کے فیشن شو ’ریزارٹ 2027‘ میں پاؤں میں پہننے کے لیے ’ہیلز نما‘ کا ایک ایسا منفرد ڈیزائن پیش کیا گیا ہے جس نے آتے ہی سوشل میڈیا پر ہلچل مچا دی ہے۔

اس شو میں ماڈلز ایسے ہیلز پہن کر ریمپ پر آئیں جن میں پاؤں کا نچلا حصہ مکمل طور پر ننگا تھا، جبکہ صرف ٹخنے کے گرد ایک باریک سی پٹی بندھی ہوئی تھی۔ اس غیر معمولی انداز نے لوگوں کو حیران بھی کیا اور الجھن میں بھی ڈالا۔

سوشل میڈیا پر ان سینڈلز پر ملا جلا ردعمل سامنے آیا۔ کچھ صارفین نے اسے عجیب اور غیر ضروری قرار دیا، جبکہ دیگر نے اسے فیشن میں ایک نیا اور تخلیقی تجربہ کہا۔

کئی لوگوں کا کہنا تھا کہ یہ جوتے پہننے کے قابل نہیں، جبکہ کچھ کے نزدیک ڈیزائن انہیں خاص بناتا ہے۔ ان منفرد جُوتوں کی قیمت ایک ہزار 500 ڈالرز (4 لاکھ 18 ہزار روپے) بتائی جاتی ہے۔

تاہم فیشن کی دنیا میں اس طرح کے منفرد اور غیر روایتی ڈیزائن کوئی نئی بات نہیں۔ ماضی میں بھی بڑے ڈیزائنرز ایسے جوتے متعارف کروا چکے ہیں جو عام استعمال کے لیے نہیں بلکہ صرف ریمپ یا نمائش کے لیے بنائے جاتے ہیں۔ ان ڈیزائنز کا مقصد عموماً نئی سوچ پیش کرنا اور لوگوں کی توجہ حاصل کرنا ہوتا ہے، نہ کہ روزمرہ استعمال۔

’شینائل‘ کے ان سینڈلز کو بھی اسی سلسلے کی ایک کڑی سمجھا جا رہا ہے۔ یہ دراصل ایک خیال کو ظاہر کرتے ہیں جہاں جوتے کی شکل کو بدل کر اسے ایک علامتی چیز بنا دیا گیا ہے۔ یعنی ہیل موجود ہے، مگر جوتا مکمل نہیں، جس سے یہ احساس پیدا ہوتا ہے جیسے آپ نے جوتے اتار دیے ہوں مگر ان کا نشان باقی ہو۔

یہ ڈیزائن شینائل کی پرانی سوچ کی بھی عکاسی کرتا ہے، جہاں آزادی، سادگی اور آرام کو اہمیت دی جاتی تھی۔ اسے ایک ایسے منظر سے بھی جوڑا جا رہا ہے جہاں کوئی شخص ساحل سمندر پر چلتے ہوئے جوتے ہاتھ میں لے لیتا ہے اور ننگے پاؤں چلنے لگتا ہے۔

فیشن ماہرین کا کہنا ہے کہ حالیہ برسوں میں جوتوں کے ڈیزائن زیادہ ہلکے، سادہ اور تصوراتی ہوتے جا رہے ہیں، اور شینائل نے اس رجحان کو مزید آگے بڑھایا ہے۔ یہ ڈیزائن صرف ایک فیشن آئٹم نہیں بلکہ ایک سوچ کی نمائندگی کرتا ہے۔

آخر میں سوال یہی اٹھتا ہے کہ کیا واقعی کوئی ایسے سینڈلز پہننا چاہے گا؟ شاید عام زندگی میں نہیں، لیکن فیشن کی دنیا میں ہر چیز کا مقصد پہننا نہیں ہوتا۔ بعض ڈیزائن صرف توجہ حاصل کرنے، بحث چھیڑنے اور نئے خیالات کو سامنے لانے کے لیے بنائے جاتے ہیں۔

اور اس لحاظ سے دیکھا جائے تو شینائل کے یہ ننگے پاؤں سینڈلز کامیاب نظر آتے ہیں، کیونکہ انہوں نے لوگوں کو بات کرنے پر مجبور کر دیا ہے۔