فیکٹ چیک: کیا میسی کی اہلیہ نے ’آئی شو سپیڈ‘ کو میسی کی جرسی گفٹ کی؟

فیفا ورلڈ کپ 2026 کے دوران یوٹیوبر اور سٹریمر آئی شو سپیڈ سے متعلق سوشل میڈیا پر وائرل ہونے والا ایک دعویٰ حقیقت کے برعکس نکلا ہے۔

سوشل میڈیا پر گردش کرنے والی ویڈیو میں ایک خاتون کو آئی شو سپیڈ کو لیونل میسی کی جرسی پیش کرتے ہوئے دیکھا جا سکتا ہے، جس کے بعد متعدد صارفین نے دعویٰ کیا کہ یہ خاتون ارجنٹائن کے سٹار فٹبالر لیونل میسی کی اہلیہ انتونیلا روکوٹو تھیں۔

یہ ویڈیو ارجنٹائن اور آسٹریا کے درمیان ورلڈ کپ میچ کے دوران ریکارڈ کی گئی تھی، جس میں آئی شو سپیڈ نے اپنے مخصوص پرجوش انداز میں ردعمل دیا۔ ویڈیو تیزی سے وائرل ہوئی اور اس کے ساتھ یہ دعویٰ بھی وائرل ہو گیا کہ میسی کی اہلیہ نے خود سپیڈ کو جرسی دینے کی کوشش کی۔

تاہم انڈین اخبار فری پریس جرنل کی فیکٹ چیک رپورٹ کے مطابق اس دعوے کی تائید کے لیے کوئی ثبوت موجود نہیں۔

رپورٹ میں کہا گیا ہے کہ ویڈیو میں نظر آنے والی خاتون انتونیلا روکوٹو نہیں ہیں اور نہ ہی ایسا کوئی ثبوت سامنے آیا ہے جو ان کی شناخت کو میسی کی اہلیہ سے جوڑتا ہو۔

فیکٹ چیک کے مطابق انتونیلا روکوٹو کی ورلڈ کپ 2026 کے دوران مختلف عوامی تقریبات اور میچوں میں موجودگی کی تصاویر اور ویڈیوز دستیاب ہیں، جن کا موازنہ وائرل کلپ میں نظر آنے والی خاتون سے کیا جائے تو دونوں میں واضح فرق دیکھا جا سکتا ہے۔

رپورٹ میں مزید کہا گیا ہے کہ انتونیلا روکوٹو ٹورنامنٹ کے دوران اکثر اپنے تین بچوں کے ساتھ لیونل میسی کی حمایت کرتی نظر آئی ہیں، جبکہ کسی معتبر بین الاقوامی میڈیا ادارے نے آئی شو سپیڈ کے ساتھ ان کی کسی ملاقات یا جرسی دینے کے واقعے کی خبر نہیں دی۔

آئی شو سپیڈ دنیا کے مقبول ترین آن لائن سٹریمرز میں شمار ہوتے ہیں اور وہ پرتگالی فٹبالر کرسٹیانو رونالڈو کے بڑے مداح سمجھے جاتے ہیں۔ اسی وجہ سے سوشل میڈیا صارفین نے اس ویڈیو کو مزاحیہ انداز میں شیئر کیا اور مختلف قیاس آرائیاں شروع ہوئیں۔

تاہم دستیاب شواہد کے مطابق یہ دعویٰ درست نہیں کہ ویڈیو میں آئی شو سپیڈ کو جرسی دینے والی خاتون لیونل میسی کی اہلیہ انتونیلا روکوٹو تھیں۔