ہیٹرک، ریکارڈز، ذاتی مسائل اور رونالڈو کا ذکر: لیونل میسی آبدیدہ کیوں ہوئے؟

فٹ بال ورلڈ کپ 2026 میں منگل کا دن بڑے ستاروں کے نام رہا۔ فرانس کے کیلیان ایمباپے اور ناروے کے ارلنگ ہالینڈ نے اپنی اپنی ٹیموں کے لیے دو، دو گول کر کے شاندار آغاز کیا، لیکن دن کے اختتام پر تمام توجہ ایک بار پھر لیونل میسی نے سمیٹ لی۔

ای ایس پی این کے مطابق الجزائر کے خلاف ارجنٹینا کی 3-0 سے کامیابی میں 38 سالہ میسی نے ہیٹ ٹرک مکمل کرتے ہوئے کئی تاریخی ریکارڈ اپنے نام کر لیے۔

یہ میچ میسی کے بین الاقوامی کیریئر کا 200واں میچ تھا، جبکہ وہ مردوں کے فٹ بال کی تاریخ میں چھ ورلڈ کپ کھیلنے والے پہلے کھلاڑی بھی بن گئے۔

اس سے قبل پانچ ورلڈ کپ کھیلنے کا ریکارڈ جرمنی کے لوتھر میتھیاس، پرتگال کے کرسٹیانو رونالڈو، اور میکسیکو کے انتونیو کارباہال، آندریس گارداڈو اور رافیل مارکیز کے پاس تھا۔

میسی نے پہلے ہاف میں پنالٹی ایریا کے باہر سے بائیں پاؤں کے شاندار شاٹ پر گول کیا، پھر دوسرے ہاف میں مزید دو بار گیند جال میں پہنچا کر اپنی پہلی ورلڈ کپ ہیٹ ٹرک مکمل کی۔

یہ ان کے بین الاقوامی کیریئر کی 11ویں ہیٹ ٹرک تھی، جبکہ وہ ورلڈ کپ میں ہیٹ ٹرک کرنے والے معمر ترین کھلاڑی بھی بن گئے۔

ان تین گولوں کے ساتھ میسی نے ورلڈ کپ میں اپنے مجموعی گولوں کی تعداد 16 کر لی اور جرمنی کے سابق سٹرائیکر میروسلاو کلوزے کے سب سے زیادہ گولوں کا ریکارڈ برابر کر دیا۔

میسی کا پہلا گول ایک اور وجہ سے بھی یادگار بن گیا۔ یہ ٹھیک 20 سال بعد آیا جب انہوں نے 2006 کے ورلڈ کپ میں سربیا اور مونٹی نیگرو کے خلاف اپنا پہلا ورلڈ کپ میچ کھیلا تھا اور اس میں بھی گول کیا تھا۔

اس کارنامے کے بعد وہ ورلڈ کپ کے پانچ مختلف ایڈیشنز میں گول کرنے والے کھلاڑیوں میں شامل ہو گئے۔

گول کرنے کے بعد میسی جذباتی دکھائی دیے اور ان کی آنکھوں میں آنسو بھی آ گئے۔

میچ کے بعد انہوں نے کہا کہ اس کا تعلق فٹ بال سے نہیں بلکہ حالیہ دنوں میں پیش آنے والے کچھ ذاتی معاملات سے تھا۔

میسی نے کہا کہ ’کلوزے، رونالڈو اور دیگر عظیم کھلاڑیوں کے ساتھ نام آنا اعزاز کی بات ہے، لیکن آخر میں یہ صرف اعداد و شمار ہیں۔‘

انہوں نے مزید کہا کہ ’میں جو کچھ اس وقت محسوس کر رہا ہوں، وہ میرے سفر کا خوبصورت ترین حصہ ہے۔ میں اس شاندار گروپ کے ساتھ ہر لمحے سے لطف اندوز ہو رہا ہوں۔‘

تاہم منگل کے روز صرف میسی ہی نہیں چمکے تھے۔

اس سے چند گھنٹے قبل فرانس نے سینیگال کو 3-1 سے شکست دی، جس میں کیلیان ایمباپے نے دو گول کیے۔

ان گولوں کے ساتھ 26 سالہ ایمباپے فرانس کی قومی ٹیم کی تاریخ کے سب سے زیادہ گول کرنے والے کھلاڑی بن گئے۔ انہوں نے 99 بین الاقوامی میچوں میں 58 گول مکمل کرتے ہوئے اولیویئر جیرود کا ریکارڈ توڑ دیا۔

ورلڈ کپ میں بھی ان کے گولوں کی تعداد 14 ہو گئی، جس سے وہ ٹورنامنٹ کی تاریخ کے نمایاں گول سکوررز میں شامل ہو گئے ہیں۔

دوسری جانب ناروے نے عراق کو 2-0 سے شکست دی، جہاں ارلنگ ہالینڈ نے اپنے پہلے ہی ورلڈ کپ میچ میں دو گول کر کے یادگار آغاز کیا۔

1998 کے بعد پہلی بار ورلڈ کپ کھیلنے والی ناروے کی ٹیم کے لیے ہالینڈ کے دونوں گول اس بات کا اشارہ تھے کہ وہ گولڈن بوٹ کی دوڑ میں ایک مضبوط امیدوار ہوں گے۔

ایک وقت ایسا محسوس ہو رہا تھا کہ ورلڈ کپ کی نئی نسل کے دو بڑے ستارے، ایمباپے اور ہالینڈ، دن کی تمام سرخیاں اپنے نام کر لیں گے، لیکن چند گھنٹے بعد میسی نے ہیٹ ٹرک اور ریکارڈ ساز کارکردگی کے ذریعے سارا منظر بدل دیا۔

ارجنٹینا کے مڈفیلڈر روڈریگو ڈی پال نے میچ کے بعد کہا کہ ’لیو کو الفاظ میں بیان کرنا مشکل ہے۔ وہ کبھی انفرادی ریکارڈز کے بارے میں نہیں سوچتے، ان کی ترجیح ہمیشہ ٹیم ہوتی ہے۔‘

ورلڈ کپ 2026 ابھی اپنے ابتدائی مرحلے میں ہے، لیکن منگل کی رات نے ایک بار پھر ثابت کر دیا کہ ہالینڈ اور ایمباپے جیسے نئے ستاروں کے عروج کے باوجود لیونل میسی اب بھی کھیل کے سب سے بڑے سٹیج پر توجہ کا مرکز ہیں۔