کشمیر الیکشن کا دوسرا مرحلہ: مہاجرین کی 12 نشستوں سمیت 20 حلقوں میں پولنگ جاری، ایک پر ملتوی
پاکستان کے زیر انتظام جموں و کشمیر میں عام انتخابات کے دوسرے مرحلے میں مظفرآباد ڈویژن کی نو عام نشستوں اور پاکستان میں مقیم جموں و کشمیر کے مہاجرین کے لیے مختص 12 نشستوں پر پولنگ کا آغاز ہو گیا ہے جبکہ ایک حلقے میں آج ہونے والی پولنگ خراب موسم کی وجہ سے ملتوی کر دی گئی ہے۔۔
قانون ساز اسمبلی کے عام انتخابات کے دوسرے مرحلے میں مظفرآباد ڈویژن کی نو عام نشستوں اور پاکستان میں مقیم جموں و کشمیر کے مہاجرین کے لیے مختص 12 نشستوں پر آج شیڈول کے مطابق پولنگ ہونا تھی، تاہم رات کے وقت بارش، لینڈ سلائیڈنگ اور عملے و سامان کے نہ پہچنے پر مظفر آباد ون میں پولنگ نہیں ہو رہی۔
پریس انفارمیشن ڈیپارٹمنٹ کمشیر کی جانب سے اتوار کی صبح جاری کیے گئے بیان کے مطابق مطابق آج مورخہ 2 اگست 2026 کو مہاجرینِ جموں و کشمیر مقیم پاکستان کی 12 قانون ساز اسمبلی کی نشستوں اور مظفرآباد ڈویژن کی 9 نشستوں پر پولنگ ہونا مقرر تھی۔
تاہم مظفرآباد-1 کے بالائی اور دشوار گزار علاقوں میں گزشتہ شب سے ہونے والی شدید بارشوں، لینڈ سلائیڈنگ اور درخت گرنے کے باعث متعدد سڑکیں بند ہو گئیں، جس کے نتیجے میں پولنگ عملے اور انتخابی سامان کی بروقت ترسیل ممکن نہ ہو سکی۔
پریس ریلیز کے مطابق ضلعی انتظامیہ اور متعلقہ اداروں کی جانب سے رات گئے تک سڑکیں بحال کرنے کی بھرپور کوششیں کی گئیں، تاہم راستے مکمل طور پر بحال نہ ہو سکے۔
پریس ریلیز میں یہ بھی بتایا گیا ہے کہ ان غیر معمولی حالات کے پیش نظر الیکشن کمیشن نے حلقہ LA-27 مظفرآباد-1 میں آج کی پولنگ ملتوی کرنے کا فیصلہ کیا ہے نئی تاریخ کا اعلان آج 2 بجے دوپہر کیا جائیگا۔
بیان کے مطابق الیکشن کمیشن اس فیصلے سے ہونے والی زحمت پر معذرت خواہ ہے اور ووٹرز سے تعاون کی اپیل کرتا ہے۔
دوسرے مرحلے میں اتوار کو مظفرآباد ڈویژن کی نو عام نشستوں اور پاکستان میں مقیم جموں و کشمیر کے مہاجرین کے لیے مختص 12 نشستوں پر پولنگ ہونا تھی۔
اس سے قبل الیکشن کمیشن کی جانب سے بتایا گیا تھا کہ انتخابی شیڈول کے مطابق ووٹنگ صبح 8 بجے سے شام 5 بجے تک بغیر کسی وقفے کے جاری رہے گی۔
قانون ساز اسمبلی کے انتخابات ابتدا میں 27 جولائی کو ایک ہی روز کرانے کا اعلان کیا گیا تھا تاہم سکیورٹی انتظامات کو مدنظر رکھتے ہوئے الیکشن کمیشن نے تمام بڑی سیاسی جماعتوں سے مشاورت کے بعد انتخابی عمل کو تین مراحل میں تقسیم کر دیا۔
پہلے مرحلے میں 27 جولائی کو میرپور ڈویژن کی 13 نشستوں پر پولنگ ہوئی، دوسرا مرحلہ 2 اگست کو مظفرآباد ڈویژن اور 12 مہاجر نشستوں پر ہوگا جبکہ تیسرے اور آخری مرحلے میں 10 اگست کو پونچھ ڈویژن کی 11 نشستوں پر ووٹ ڈالے جائیں گے۔
دوسرے مرحلے میں مظفرآباد، جہلم ویلی اور نیلم اضلاع پر مشتمل مظفرآباد ڈویژن کی نو حلقوں میں ووٹنگ ہوگی۔ اس کے ساتھ پاکستان کے مختلف شہروں میں مقیم انڈیا زیر انتظام جموں و کشمیر سے ہجرت کرنے والے کشمیریوں کے لیے مختص 12 مہاجر نشستوں پر بھی پولنگ ہوگی، جنہیں حالیہ سیاسی بحث کے باعث غیرمعمولی اہمیت حاصل ہے۔
پاکستان کے زیر انتظام جموں و کشمیر کی قانون ساز اسمبلی مجموعی طور پر 53 ارکان پر مشتمل ہے، جن میں 45 براہ راست منتخب ہونے والی جنرل نشستیں اور آٹھ مخصوص نشستیں شامل ہیں۔ براہ راست منتخب ہونے والی نشستوں میں 33 حلقے آزاد کشمیر کے اندر جبکہ 12 نشستیں پاکستان میں مقیم جموں و کشمیر کے مہاجرین کے لیے مختص ہیں۔ خواتین، علما، ٹیکنوکریٹس اور اوورسیز کشمیریوں کی مخصوص نشستیں عام انتخابات کے بعد متناسب نمائندگی کی بنیاد پر پُر کی جائیں گی۔
