فالکنری نمائش کی مقبولیت میں نمایاں اضافہ، سات لاکھ سے زیادہ افراد کی شرکت

چند ہی برسوں میں انٹرنیشنل سعودی فالکنز اینڈ ہنٹنگ نمائش نے نمایاں ترقی کی ہے۔ پہلے سال نمائش میں ایک لاکھ 20 ہزار افراد نے شرکت کی جبکہ 2025 میں یہ تعداد بڑھ کرسات لاکھ سے تجاوز کر گئی جو اب تک کی سب سے زیادہ حاضری ہے۔

سعودی پریس ایجنسی (ایس پی اے) کے مطابق یہ مسلسل بڑھتی مقبولیت نمائش کے شرکا اور مقامی و عالمی سطح پر بڑھتے ہوئے اثر و رسوخ کی عکاسی کرتی ہے۔ اس سے نمائش کی حیثیت ایک ایسے جامع سعودی پلیٹ فارم کے طور پر مزید مضبوط ہوئی ہے جہاں ثقافت، مہم جوئی، تفریح اور کاروبار ایک ساتھ جمع ہوتے ہیں۔ اس کا آغاز ریاض سے ہوتا ہے جبکہ اس کی رسائی دنیا بھر تک پھیل چکی ہے۔

نیشنل سینٹر فار فالکنز اپنی نوعیت کی دنیا کی سب سے بڑی نمائش کا انعقاد کرتا ہے۔ یہ نمائش فالکنری کے ورثے کے تحفظ اور اس سے متعلق سرگرمیوں کے فروغ کی کوششوں کا حصہ ہے۔

نمائش میں مملکت اور بیرونِ ملک سے فالکن پالنے والے افراد، نمائش کنندگان، کمپنیاں اور شائقین ایک ہی چھت تلے جمع ہوتے ہیں۔ یہاں فالکن، شکار، ثقافتی ورثے اور جدید تجربات سے متعلق مختلف سرگرمیاں پیش کی جاتی ہیں جس سے اس شعبے میں سعودی عرب کی موجودگی مزید مضبوط ہوتی ہے اور شرکت، معلومات کے تبادلے اور تجارتی سرگرمیوں کے نئے مواقع پیدا ہوتے ہیں۔

سنہ 2018 میں اس نمائش میں تقریباً ایک لاکھ 20 ہزار افراد نے شرکت کی۔ یہ تعداد 2019 میں بڑھ کر ساڑھے تین لاکھ ہوئی، 2021 میں پانچ لاکھ تک پہنچی، 2022 میں پانچ لاکھ 12 ہزار سے تجاوز کر گئی اور 2023 میں ساڑھے پانچ لاکھ سے اوپر نکل گئی۔

اس کے بعد 2024 میں 6 لاکھ 49 ہزار سے زیادہ افراد نے اس نمائش کا رخ کیا اور پھر 2025 میں 10 دنوں کے دوران سات لاکھ سے زیادہ افراد کی ریکارڈ آمد درج کی گئی۔

یہ نمو تجارتی اور بین الاقوامی شرکت تک بھی پھیلی ہے۔ 2024 کی نمائش میں 26 مخصوص شعبوں سے تعلق رکھنے والے تقریباً 1210 نمائش کنندگان اور برینڈ شامل تھے جبکہ 2025 میں یہ تعداد 47 ممالک کے 1400 سے زیادہ نمائش کنندگان اور برینڈ تک پہنچ گئی جو 28 سے زیادہ مخصوص شعبوں پر محیط تھے۔

اس اضافے کے ساتھ نمائش نے بھی نمایاں وسعت اختیار کی ہے۔ یہ صرف فالکنری اور شکار سے متعلق نمائش سے آگے بڑھ کر ثقافت، علم، سیاحت، مہم جوئی، تفریح اور کاروبار کا جامع مرکز بن گئی ہے۔

’سب کے لیے ایک منزل‘ کے عنوان سے یہ نمائش اپنے دائرۂ کار اور ناظرین کو وسیع کر رہی ہے جبکہ فالکنری اور شکار سے جڑی اپنی بنیادی شناخت کو بھی برقرار رکھے ہوئے ہے۔

نمائش کے مواد کو بہتر بنانے اور آنے والوں کو فراہم کیے جانے والے تجربات کو وسعت دینے کی کاوشوں کے حصے کے طور پر، رواں سال کی نمائش میں نئے تجربات اور زونز شامل ہیں، جن میں ہائیکنگ کا علاقہ جو پہاڑی ماحول اور مہم جوئی و دریافت کے تجربات کا منظر پیش کرتا ہے، ایک سمندری شکار کا علاقہ، اور اونٹوں اور عربی اونٹوں کی نیلامی کے لیے مخصوص علاقہ شامل ہے۔