Sorry, you need to enable JavaScript to visit this website.

'میں اور صدر ٹرمپ غیر روایتی ہیں'

عمران خان کا کہنا تھا کہ ’ہم توقع رکھتے ہیں کہ جو بھی امریکہ کا صدر منتخب ہو وہ پاکستان اور انڈیا کے ساتھ یکساں سلوک کرے‘ (فوٹو: ٹوئٹر) 
وزیراعظم عمران خان نے کہا ہے کہ ’امریکہ پاکستان اور انڈیا کے ساتھ خاص طور پر کشمیر کے تنازعے پر برابری کا سلوک کرے۔‘
جرمن جریدے ’دیر سپیگل‘ کو ایک انٹرویو میں عمران خان کا کہنا تھا کہ ’یہ خطہ ایک ہاٹ سپاٹ ہے جو کسی بھی وقت بھڑک سکتا ہے۔‘
’اسی لیے ہم امریکہ سے دنیا کے طاقتور ترین ملک سے چاہے جو بھی صدر منتخب ہو یہ توقع رکھتے ہیں کہ وہ پاکستان کے ساتھ یکساں سلوک کرے۔‘  

 

انہوں نے کہا کہ ’امریکہ سمجھتا ہے کہ انڈیا، چین پر قابو پالے گا جو کہ مکمل طور پر ایک ناقص دلیل ہے۔ انڈیا اپنے ہمسایہ ممالک ’چین، بنگلہ دیش، سری لنکا اور ہمارے لیے خطرہ ہے۔‘  
’انڈیا میں خطے کی سب سے انتہا پسند اور نسل پرست حکومت موجود ہے۔ انڈیا ایک فسطائی ریاست ہے جو کہ 1920 اور 1930 کی دہائی کے نازیوں سے متاثر ہے۔‘
امریکہ کے صدارتی الیکشن سے متعلق وزیراعظم عمران خان کا کہنا تھا کہ ’جو بائیڈن امریکی پولز میں آگے ہیں لیکن ڈونلڈ ٹرمپ بھی غیر معمولی سیاست دان ہیں۔
وزیراعظم عمران خان سے انٹرویو میں سوال کیا گیا کہ کیا وہ اپنے اور صدر ٹرمپ میں کوئی مماثلت دیکھتے ہیں؟ اس پر عمران خان کا کہنا تھا کہ ’میں اور صدر ٹرمپ کئی حوالوں سے غیر روایتی ہیں۔‘
’ہمیں بہت زیادہ غیر روایتی ہونا چاہیے اور کچھ معاملات میں صدر ٹرمپ ایسا کرتے بھی ہیں۔‘ 

وزیراعظم کا کہنا تھا کہ ’میں اہلیہ سے ہر ایشو پر بات کرتا ہوں، ’وہ میری دوست اور ساتھی ہیں‘ (فوٹو: فیس بُک)

خاتونِ اول بشریٰ بی بی کے حوالے سے گفتگو کرتے ہوئے وزیراعظم عمران خان کا کہنا تھا کہ ’صرف کوئی بے وقوف ہی ہوگا اپنی اہلیہ سے اپنی زندگی کی ہر بات نہیں کرتا ہوگا۔‘
انہوں نے کہا کہ ’میری اہلیہ بہت حکمت والی ہیں، میں ان سے ہر ایشو پر بات کرتا ہوں، میں ان سے حکومت میں پیش آنے والے مسائل اور پیچیدہ صورت حال سے نمٹنے کے حوالے سے بھی تبادلہ خیال کرتا ہوں۔‘  
وہ میری دوست اور ساتھی ہیں۔ میں ان کے بغیر نہیں رہ پاؤں گا۔‘

شیئر: