انڈیا کے زیرِانتظام جموں کے علاقے میں مسلسل تین روز سے جاری بارشوں کے نتیجے میں علاقے میں بڑے پیمانے پر تباہی ہوئی ہے اور کم سے کم 9 افراد ہلاک ہو گئے ہیں۔
انڈین نیوز ویب سائٹ ہندوستان ٹائمز کے مطابق ان میں سے چار افراد ڈوڈا جبکہ پانچ ویشنو دیوی یاترا کے دوران ہلاک اور 14 زخمی ہو گئے ہیں۔ حکام نے دو روز کے لیے تعلیمی اداروں کو بند کر دیا ہے۔
اس کے بعد ویشنو دیوی یاترا کو عارضی طور پر معطل کر دیا گیا ہے جبکہ علاقے میں ریسکیو آپریشن کا آغاز ہو گیا ہے۔ اسی اثنا میں بھگواتی نگر کے علاقے میں سیلابی ریلے سے چوتھا پُل بھی تباہ ہو گیا ہے۔
حکام کے مطابق تاوی اور چناب سمیت متعدد دریاؤں میں پانی خطرے کے نشان سے اُوپر یا خطرے کے نشان تک پہنچ چکا ہے۔ بارشوں سے ہونے والی لینڈسلائیڈنگ سے کئی سڑکیں بند ہو چکی ہیں جن میں جموں سری نگر نیشنل ہائی وے بھی شامل ہے۔
اس سے قبل جموں و کشمیر کے وزیراعلٰی عمر عبداللہ نے سیلاب کی صورت حال کا جائزہ لینے کے لیے ایک اجلاس کی صدارت کی۔ انہوں ںے حکام کو ہدایت کی کہ ہائی الرٹ رہیں اور سیلاب سے نمٹنے کے لیے تمام ضروری اقدامات اٹھائیں۔
سوشل میڈیا پلیٹ فارم ’ایکس‘ پر انہوں ںے لکھا کہ ’جموں کے کئی علاقوں میں صورت حال تشویش ناک ہے۔ میں پہلی دستیاب فلائٹ کے ذریعے سری نگر سے جموں پہنچ رہا ہوں تاکہ ذاتی طور پر صورت حال کی نگرانی کر سکوں۔‘
انڈیا کے محکمہ موسمیات نے یونین ٹیریٹری کے متعدد علاقوں کے لیے سیلاب اور شدید بارشوں کا ریڈ الرٹ جاری کیا ہے جن پُونچھ، میرپور، راجوڑی، کُلگام، ریاسی، جموں، سامبا، کٹھوا، کشتواڑ، اُدھم پور، رامبان اور ڈوڈا شامل ہیں۔
