فیلڈ مارشل عاصم منیر کی ایشیا کپ انڈر 19 کی فاتح ٹیم سے ملاقات

پاکستان کی ڈیفنس فورسز کے سربراہ فیلڈ مارشل عاصم منیر نے انڈیا کو ایشیا کپ انڈر 19 ہرانے والی پاکستان انڈر19 ٹیم سے ملاقات کی ہے۔

پاکستانی فوج کے شعبہ تعلقات عامہ (آئی ایس پی آر) کی پریس ریلیز کے مطابق پیر کو فیلڈ مارشل نے انڈر 19 ٹیم سے فوج کے ہیڈکواٹرز جی ایچ کیو میں ملاقات کی اور مبارکباد دی۔

آئی ایس پی آر کے مطابق ’اس موقع پر فیلڈ مارشل نے ایشیا کپ مینز انڈر 19 جیتنے پر ٹیم کے کھلاڑیوں، ٹیم مینجمنٹ اور آفیشلز کو دل کی گہرائیوں سے مبارکباد دی۔‘

’انہوں نے ٹیم کی شاندار کارکردگی، نظم و ضبط، ٹیم ورک اور فائٹنگ سپرٹ کو سراہتے ہوئے اس کامیابی کو پوری قوم کے لیے باعثِ فخر قرار دیا۔‘

پریس ریلیز کے مطابق ’فیلڈ مارشل نے نوجوان کھلاڑیوں کی محنت اور لگن کی تعریف کرتے ہوئے کہا کہ یہ کامیابی پاکستان کے نوجوانوں کی صلاحیتوں اور ٹیلنٹ کی عکاس ہے۔‘

’انہوں نے کھلاڑیوں کو ہدایت کی کہ وہ پیشہ ورانہ معیار برقرار رکھتے ہوئے مزید محنت کریں اور میدان کے اندر اور باہر ملک کے سفیر بن کر ابھریں۔‘

’فیلڈ مارشل نے اس بات پر زور دیا کہ پاکستان کا نوجوان طبقہ ملک کے مستقبل کی بنیاد ہے، جس کی توانائی، صلاحیت اور کردار قومی ترقی اور عالمی سطح پر پاکستان کے وقار کا تعین کریں گے۔‘

’انہوں نے نوجوانوں کو بااختیار بنانے اور مختلف شعبوں میں نمایاں کردار ادا کرنے کے عزم کا اعادہ کیا۔‘

انڈر 19 ٹیم کے ارکان نے فیلڈ مارشل سید عاصم منیر کا شکریہ ادا کرتے ہوئے کہا کہ ان کی حوصلہ افزائی اور پذیرائی ٹیم کے لیے مزید محنت اور کامیابی کا باعث بنے گی۔