بگ بیش لیگ میں پاکستانی بولر زمان خان کا مایُوس کُن آغاز، بولنگ ایکشن پر بھی اعتراض

آسٹریلیا میں جاری بگ بیش لیگ (بی بی ایل) کے ایک میچ میں پاکستان کے فاسٹ بولر زمان خان اُس وقت خبروں میں آگئے جب ان کے منفرد سلنگ شاٹ بولنگ ایکشن پر آسٹریلوی سٹار بیٹر ڈیوڈ وارنر نے کھلے عام سوال اٹھا دیا۔

’ایم ایس این‘ کے مطابق سڈنی تھنڈر کی جانب سے کھیلتے ہوئے ڈیوڈ وارنر نے شاندار بیٹنگ کا مظاہرہ کیا اور 82 رنز کی جارحانہ اننگز کھیلی۔

میچ کے دوران ڈیوڈ وارنر کو برسبین ہیٹ کی نمائندگی کرنے والے زمان خان کے ایکشن پر اعتراض کرتے دیکھا گیا۔

وہ بار بار زمان کی طرف اشارے کرتے رہے اور آن فیلڈ امپائر سے ان کے بولنگ ایکشن کی قانونی حیثیت پر بات کرتے دکھائی دیے۔ یہ تمام مناظر براہِ راست نشریات میں واضح طور پر نظر آئے جس کے بعد سوشل میڈیا پر بھی اس معاملے پر بحث شروع ہو گئی۔

زمان خان کے لیے یہ میچ سیزن کا مشکل آغاز ثابت ہوا۔ انہیں ابتدائی اوورز میں متعارف کرایا گیا، مگر وہ لائن اور لینتھ پر قابو نہ پا سکے۔ ان کے سپیل کے دوران وائیڈ گیندیں، فل ٹاس اور شارٹ بالز دیکھنے میں آئیں جن کا ڈیوڈ وارنر نے بھرپور فائدہ اٹھایا۔

ڈیوڈ وارنر نے پرسکون انداز میں سنگلز لیتے ہوئے کئی گیندوں کو باؤنڈری کی راہ دکھائی۔ اسی اننگز کے دوران ڈیوڈ وارنر نے بگ بیش لیگ کی اپنی چھٹی نصف سینچری بھی مکمل کی۔

میچ میں تین اوورز کے بدلے زمان خان نے بغیر کوئی وکٹ حاصل کیے 32 رنز دیے۔

زمان خان برسبین ہیٹ کی ٹیم کا حصہ ہیں اور وہ شاہین شاہ آفریدی کے متبادل کے طور پر شامل کیے گئے ہیں۔ یہ بگ بیش لیگ کے رواں سیزن میں اُن کا پہلا میچ تھا۔

اگرچہ زمان خان کے بولنگ ایکشن پر سوالات اٹھے، تاہم اس میچ میں ان کے خلاف کوئی باضابطہ کارروائی نہیں کی گئی۔ دوسری جانب برسبین ہیٹ نے میچ سات وکٹوں سے جیت لیا جبکہ عثمان خواجہ نے 78 رنز کی عمدہ اننگز کھیل کر ٹیم کو فتح دلائی۔