پی ایس ایل کے انتظامی ڈھانچے میں بڑی تبدیلیوں کا اعلان

پاکستان سپر لیگ (پی ایس ایل) کے انتظامی ڈھانچے میں بڑے پیمانے پر تبدیلیوں کا اعلان کر دیا گیا ہے۔

پاکستان کرکٹ بورڈ (پی سی بی) کے مطابق ان نئی تبدیلیوں کا اطلاق ٹورنامنٹ کے گیارہویں ایڈیشن سے ہوگا جس کا آغاز 26 مارچ کو ہوگا۔

پی ایس ایل 11 میں کھلاڑیوں کی سلیکشن ڈرافٹ کی بجائے آکشن کے ذریعے کی جائے گی، جس کا مقصد ٹیموں میں بہتر توازن پیدا کرنا اور کھلاڑیوں کو زیادہ کمائی کے مواقع فراہم کرنا ہے۔

پی ایس ایل انتظامیہ کے مطابق نئے سسٹم کے تحت مینٹورز، برانڈ ایمبیسڈر اور رائٹ ٹو میچ (آر ٹی ایم) قوانین کو ختم کر دیا گیا ہے۔

اسی طرح سے آکشن سے قبل ہر فرنچائز کو مجموعی طور پر چار کھلاڑی ریٹین کرنے کی اجازت ہوگی، تاہم ہر کیٹیگری سے صرف ایک کھلاڑی کو برقرار رکھا جا سکے گا۔

پی ایس ایل میں شامل ہونے والی دونوں نئی فرنچائزز کو آکشن سے قبل چار، چار کھلاڑی منتخب کرنے کا موقع دیا جائے گا۔

اس کے علاوہ ہر فرنچائز کو ایک بین الاقوامی کھلاڑی کو ڈائریکٹ سائن کرنے کی اجازت بھی دی گئی ہے، بشرطیکہ وہ کھلاڑی پی ایس ایل 2025 ایڈیشن کا حصہ نہ رہا ہو۔

آکشن کے لیے ہر ٹیم کا سیلری کیپ 16 لاکھ امریکی ڈالر مقرر کیا گیا ہے۔

پی ایس ایل کا گیارہواں ایڈیشن 26 مارچ سے شروع ہوگا جبکہ پی ایس ایل 11 کے کچھ میچز فیصل آباد کے اقبال سٹیڈیم میں بھی کھیلے جائیں گے۔