امریکہ نے آبنائے ہُرمز سے گزرنے والے جہازوں اور آئل ٹینکروں کو تحفظ فراہم کرنے کا اعلان کیا ہے۔
امریکہ کے وزیرِ توانائی کرس رائٹ نے جمعے کو کہا کہ ’امریکی بحریہ جلد آبنائے ہُرمز سے گزرنے والے تجارتی جہازوں اور آئل ٹینکروں کو حفاظت فراہم کرنے کے لیے تیار ہے۔‘
انہوں نے امریکی ٹی وی ’فاکس نیوز‘ کے پروگرام ’فاکس اینڈ فرینڈز‘ میں گفتگو کرتے ہوئے کہا کہ ’جیسے ہی حالات مناسب ہوں گے، ہم آبنائے ہُرمز سے گزرنے والے جہازوں کو سکیورٹی فراہم کریں گے تاکہ توانائی کی ترسیل دوبارہ شروع ہو سکے۔‘
واضح رہے کہ اس وقت امریکہ اور اسرائیل کی ایران کے ساتھ جنگ کی وجہ سے اس اہم سمندری راستے پر جہازوں کی آمدورفت شدید متاثر ہوئی ہے۔
اس سے قبل منگل کو امریکہ کے صدر ڈونلڈ ٹرمپ نے اعلان کیا تھا کہ ’امریکی بحریہ جلد سے جلد آئل ٹینکروں کو آبنائے ہُرمز سے گزرانے کے لیے تحفظ فراہم کرے گی۔‘
اس اقدام کا مقصد دنیا بھر میں تیل کی سپلائی میں رُکاوٹ کو روکنا ہے۔
