’امریکی حملوں کا اب تک کا شدید ترین دن‘، ایران لڑائی جاری رکھنے کے لیے پرعزم

امریکی وزیرِ دفاع پیٹ ہیگسیتھ نے کہا ہے کہ منگل کا دن ایران کے اندر امریکی حملوں کا اب تک کا سب سے شدید دن ہوگا، جبکہ ایران نے لڑائی جاری رکھنے کا عزم ظاہر کیا ہے۔

امریکی نیوز ایجنسی ایسوسی ایٹڈ پریس کے مطابق اسی دوران اسرائیلی وزیرِ اعظم بنیامین نیتن یاہو نے کہا کہ ’ہم ان کی ہڈیاں توڑ رہے ہیں‘ اور دعویٰ کیا کہ جنگ کا مقصد ایران کی حکومت کا عوامی طور پر تختہ الٹنا ہے۔

امریکی صدر ڈونلڈ ٹرمپ نے اس کے برعکس جنگ کے دورانیے کے بارے میں متضاد اشارے دیے، جس کے باعث پیر کو مالیاتی اور ایندھن کی منڈیوں میں شدید اتار چڑھاؤ دیکھنے میں آیا۔ منگل کو امریکی سٹاک مارکیٹ اور تیل کی قیمتیں نسبتاً مستحکم تھیں۔

ایرانی پارلیمنٹ کے اسپیکر محمد باقر قالیباف نے یہ تاثر مسترد کر دیا کہ تہران نے جنگ بندی کی کوئی کوشش کی ہے۔ ایران کے ایک اور اعلیٰ سکیورٹی اہلکار علی لاریجانی نے ایکس پر ٹرمپ کو مخاطب کرتے ہوئے دھمکی آمیز لہجے میں لکھا کہ ’ایران تمہاری خالی دھمکیوں سے نہیں ڈرتا۔ تم سے بڑے بھی ایران کو ختم نہیں کر سکے۔ خیال رکھو، خود کہیں ختم نہ ہو جاؤ۔‘

ہیگسیتھ نے کہا کہ امریکہ سکول پر حملے کی تحقیقات ’بہت سنجیدگی‘ سے کر رہا ہے۔

ایک پریس کانفرنس میں ایک رپورٹر کے سوال کے جواب میں، کہ اس حملے کی ذمہ داری کے بارے میں کیا کارروائی ہو رہی ہے، ہیگسیتھ نے کہا کہ ’ہم معاملات کو بہت، بہت سنجیدگی سے لیتے ہیں اور ان کی مکمل تحقیقات کرتے ہیں۔‘

انہوں نے کہا کہ ’کوئی بھی ملک عام شہریوں کو نشانہ نہ بننے دینے کے لیے امریکہ سے زیادہ احتیاط نہیں کرتا اور یہ بھی کہہ دیا کہ ’اوپن سورس معلومات‘ پر انحصار کر کے کسی واقعے کا فیصلہ نہیں کرنا چاہیے۔

سیٹیلائٹ تصاویر، ماہرین کا تجزیہ، ایک امریکی اہلکار اور عوامی معلومات سے یہ اندازہ ہوتا ہے کہ کم از کم 165 افراد، جن میں زیادہ تر بچے تھے، کی ہلاکت کا سبب وہ امریکی فضائی حملے تھے جنہوں نے ایران کی پاسدارانِ انقلاب سے وابستہ ایک قریبی کمپاؤنڈ کو بھی نشانہ بنایا۔

ٹرمپ نے پیر کو غلط طور پر دعویٰ کیا کہ ایران کے پاس امریکی ٹاما ہاک کروز میزائل تک رسائی ہے وہی ہتھیار جس سے مبینہ طور پر سکول کو نشانہ بنایا گیا۔