ہالی وڈ کے ایکشن ہیرو اور انٹرنیٹ میمز کی دنیا کے بادشاہ چک نورِس چل بسے

امریکی مارشل آرٹسٹ اور ہالی وڈ ایکشن سٹار چک نورس انتقال کر گئے ہیں۔ ان کی عمر 86 برس تھی۔

فرانسیسی خبر رساں ادارے اے ایف پی کے مطابق چک نورس کے خاندان نے جمعے کو انسٹاگرام پر جاری بیان میں کہا کہ ’ہم بھاری دل کے ساتھ یہ خبر شیئر کر رہے ہیں کہ ہمارے پیارے چک نورس کل صبح اچانک انتقال کر گئے۔‘

بیان میں مزید کہا گیا کہ ’دنیا کے لیے وہ ایک مارشل آرٹسٹ، اداکار اور طاقت کی علامت تھے، لیکن ہمارے لیے وہ ایک وفادار شوہر، محبت کرنے والے والد اور دادا، ایک شاندار بھائی اور ہمارے خاندان کا دل تھے۔‘

امریکی میڈیا کے مطابق، نورس کو ان کی وفات سے چند روز قبل جزیرے ہوائی میں ایک نامعلوم بیماری کے باعث ہسپتال میں داخل کیا گیا تھا۔ اس سے کچھ دن پہلے انہوں نے اپنی 86ویں سالگرہ منائی تھی اور سوشل میڈیا پر ایک ویڈیو شیئر کی تھی جس میں وہ باکسنگ کرتے ہوئے کہہ رہے تھے: ’میں بوڑھا نہیں ہوتا، میں لیول اپ کرتا ہوں۔‘

چک نورس نے اپنے کیریئر کا آغاز 1968 میں فلم ’دی ریکنگ کریو‘ میں ایک مختصر کردار سے کیا۔ چار سال بعد، ان کی بروس لی کے ساتھ فلم ’دی وے آف دی ڈریگن‘ میں شاندار فائٹ نے انہیں عالمی شہرت دلائی، اور وہ فلم اور ٹی وی دونوں میں ایک آئیکون بن گئے۔

بڑی سکرین کا آئیکون

امریکی فضائیہ میں نوجوانی کے دوران جنوبی کوریا کے ایک ایئربیس پر تعیناتی نے کارلوس رے چک نورس کو مارشل آرٹس کی طرف مائل کیا۔

کورین مارشل آرٹ ’تانگ سو دو‘سیکھنے کے بعد چک نورس نے نہ صرف اپنے حریفوں کو شکست دی بلکہ خود بھی فلمی دنیا میں ایک بڑے سٹار بن گئے۔ ان کی پیدائش 10 مارچ 1940 کو ریان، اوکلاہاما میں ہوئی تھی۔

سنہ 1972 کی کلاسک کنگ فو فلم ’دی وے آف دی ڈریگن‘ میں بروس لی کے ساتھ ان کی یادگار فائٹ نے انہیں فلم اور ٹی وی دونوں میں شہرت کی بلندیوں تک پہنچا دیا۔

مذکورہ فلم نے اپنے 130,000 ڈالر کے بجٹ سے ایک ہزار گنا زیادہ کمائی کی۔

اگرچہ بچپن میں وہ جان وین کو اپنا آئیڈیل مانتے تھے، لیکن بعد میں وہ اداکار بن گئے۔

انہوں نے 1962 میں فضائیہ چھوڑ دی اور لاس اینجلس میں مارشل آرٹس کا ایک ادارہ قائم کیا۔

سنہ 1967 تک، میڈیسن سکوائر گارڈن میں امریکی کراٹے چیمپئن شپ جیتنے کے بعد، چک نورس مشہور شخصیات جیسے سٹیو مک کوئین، پرسکیلا پریسلے اور ڈونی آسمونڈ کے پسندیدہ انسٹرکٹر بن گئے۔

’دی وے آف دی ڈریگن‘ کی کامیابی کے بعد انہوں نے اداکاری کی باقاعدہ تربیت حاصل کی۔