کیا آپ کی زندگی میں ڈیلیٹ بٹن موجود ہے؟ عامر خاکوانی کا کالم

پچھلے دنوں ایک پرانے دوست سے ملاقات ہوئی جو برسوں بعد لاہور آئے تھے۔ باتوں باتوں میں انہوں نے ایک واقعہ سنایا جو کئی سال پہلے ان کے ساتھ پیش آیا تھا۔ کسی قریبی عزیز نے انہیں دھوکہ دیا، بڑا نقصان کیا، رسوا کیا۔

میں نے پوچھا کہ اب کیسا محسوس ہوتا ہے؟ وہ مسکرائے اور بولے، ’یہ فائل میں نے بند کر دی ہے۔‘ میں نے دلچسپی سے پوچھا کیا مطلب؟ کہنے لگے، ’جو ختم ہوگیا، اسے ذہن کی یادداشت سے نکال دینا چاہیے، ورنہ پرانا غصہ نئی زندگی کھا جاتا ہے۔‘ بات چھوٹی سی تھی، مگر دل میں اتر گئی۔

صاحبو، ذرا سوچیں کہ جب موبائل کی میموری فل ہوجاتی ہے تو ہم کیا کرتے ہیں؟ فوری صفائی شروع ہوجاتی ہے، پرانی تصویریں ختم، غیر ضروری ویڈیو باہر، فضول ایپ ڈیلیٹ۔ منٹوں میں موبائل ہلکا ہوجاتا ہے، رفتار بہتر ہوجاتی ہے، کام میں آسانی ہوجاتی ہے۔ حیرت ہے کہ آج کی دنیا کے ہم انسان اپنے موبائل کی گیلری تو روز صاف کرتے ہیں، دل کے نہاں خانوں میں سالوں پرانی نفرتوں، رنجشوں اور بغض کا ملبہ جمع کرتے رہتے ہیں اور خود کو اندر سے بھاری اور بیمار کرتے چلے جاتے ہیں۔

ذہن میں چھپی الماری

ہم میں سے بیشتر لوگ اپنے ذہن میں ایک الماری بنائے رکھتے ہیں جس کےمختلف خانوں میں برسوں پرانے گِلے، شکوے، ناراضی ،تکلیفیں، بے عزتیاں، دھوکے، غصے اور کینے ترتیب سے سجائے ہوتے ہیں۔ جیسے ہی کوئی نیا ناخوشگوار واقعہ ہو تو اسے بھی سنبھال کر وہیں رکھ دیتے ہیں۔ پھر رات کو تنہائی میں، کبھی کبھی بے وجہ، وہ الماری کھول لیتے ہیں اور ایک ایک چیز نکال کر پھر سے تکلیف محسوس کرتے ہیں۔ یہ الماری دراصل ہماری سب سے بڑی دشمن ہے۔

ماہرین نفسیات برسوں سے یہ بات کہتے آئے ہیں، مگر حال ہی میں سائنسی تحقیق نے اسے پوری طرح ثابت کر دیا ہے۔ جب انسان کسی پرانی شکایت یا ناراضی کو دل میں سنبھالے رکھتا ہے تو جسم اسے ایک حقیقی خطرہ سمجھ کر وہی ردعمل دیتا ہے جو کسی جسمانی حملے پر دیتا ہے۔ سٹریس ہارمون بڑھ جاتے ہیں، دل کی دھڑکن تیز ہو جاتی اور پٹھے کھنچ جاتے ہیں۔ یعنی آپ ماضی کے کسی دشمن کو یاد کر کے اپنے جسم کو آج نقصان پہنچا رہے ہیں۔ غصہ اور انتقام کی خواہش بلڈ پریشر بڑھاتی ہے، نیند متاثر ہوتی ہے اور صحت پر گہرے منفی اثرات مرتب ہوتے ہیں۔ یوں دوسرے کا کچھ نہیں بگڑتا، اپنا ہی بگڑتا ہے۔

ایک پرانی کہاوت کا مفہوم ہے کہ کینہ رکھنا ایسے ہے جیسے آپ خود زہر پی کر دوسرے کے مرنے کا انتظار کریں۔ کتنی بڑی سچائی ہے اس میں۔ قرآن کریم میں اللہ تعالیٰ نے معاف کرنے والوں کو بار بار سراہا ہے۔ یہ محض اخلاق کی درسگاہ کا سبق نہیں، یہ تو ہماری اپنی فلاح کا نسخہ ہے۔ معاف کرنا دوسرے پر احسان نہیں، خود پر مہربانی ہے۔

پانچ سات چیزیں ایسی ہیں جو ہر حال میں بھلانا سیکھنا ہوں گی۔ ان کے لیے ڈیلیٹ بٹن کا ہوناضروری ہے، اگر نہیں تو لگوا لیں۔ کہاں سے ؟ اس کا جواب آگے چل کر دیتا ہوں۔

کیا ڈیلیٹ کرنا چاہیے : وہ غصہ جو راتوں کو سونے نہیں دیتا۔ وہ کینہ جو آپ کی خوشی چراتا رہتا ہے۔ پرانی یادیں جو بار بار زخم کو تازہ کرتی ہیں۔ زہریلے لوگ جن کی یاد صرف زہر بن کر رہ گئی ہے۔ ناکامیوں پر خود کو بار بار کوستا رہنا۔دوسروں سے غیر ضروری موازنہ اور حسد۔ یہ سب چیزیں ڈیلیٹ کرنا ہوں گی ہمیشہ کےلیے۔

تاریخ میں اس کی سب سے روشن مثال حضرت یوسف  کی ہے۔ سیرت مبارکہ میں تو ایسی کئی جگمگاتی مثالیں موجود ہے۔ بات لمبی ہوجائےگی ورنہ اسلامی تاریخ میں بہت سے واقعات موجود ہیں۔ دورجدید میں نیلسن منڈیا ایک شاندار مثال ہے۔ ستائیس سال قید کاٹی، رہاہوا تو سوچا کہ اگر میں نے اپنی تلخی اور نفرت یہیں جیل میں نہ چھوڑی تو میں پھر بھی قید میں ہی رہوں گا۔ سوچیں ذرا، یہ کتنے بڑے دل کی بات ہے۔

دل کی ری سائیکل بِن

ہمارا مسئلہ یہ بھی ہے کہ ہم بظاہر معاف کر دیتے ہیں مگر بات دل کی ری سائیکل بِن میں رکھ چھوڑتے ہیں اور موقع ملتے ہی پھر سے نکال کر دل کے ڈرائنگ روم میں سجا لیتے ہیں۔ ’یاد ہے تم نے فلاں سال کیا کیا تھا؟‘ یہ معافی نہیں، یہ تو ہتھیار جمع کرنا ہے۔ سچی معافی وہ ہے جہاں سے فائل ہمیشہ کے لیے ختم ہو جائے، ری سائیکل بن یا ٹریش کین میں بھی نہ رہے۔

میں خود اپنی زندگی میں یہ کوشش کرتا ہوں کہ جو تکلیف دہ لمحہ تھا، جو ناخوشگوار واقعہ تھا، اسے دل کی سکرین پر زیادہ دیر نہ ٹکنے دوں۔ کہاں تک کامیاب ہوا ہوں، یہ نہیں پتہ، مگر کوشش جاری ہے۔ بعض اوقات کوئی پرانی بات یاد دلا دیتا ہے یا کوئی چہرہ کہیں نظر آ جاتا ہے، تو وہ پرانا درد لمحے بھر کو تازہ ہو جاتا ہے۔ تب اپنے آپ سے کہتا ہوں، ’یہ فائل بند ہو چکی ہے۔‘

ایک فولڈر جو محفوظ رہنا چاہیے

اس سب کے ساتھ یہ کہنا ضروری ہے کہ ہر چیز ڈیلیٹ نہیں کرنی چاہیے ۔ زندگی میں ایک ایسا فولڈر بھی ہونا چاہیے، جہاں ہر چیز ہمیشہ کے لیے محفوظ اور تازہ رہے۔ وہاں اپنے ساتھ کئی گئی اچھائیاں، نیکیاں، بھلائیوں کو محفوظ کر دیں۔

یاد رکھیں احسان کو یاد رکھنا شرافت ہے اور تلخیوں کو مٹا دینا ظرف ہے۔ ظرف اور شرافت کا یہی توازن زندگی کو خوبصورت بناتا ہے۔ کسی کا وہ احسان جو مشکل گھڑی میں کام آیا، اپنے استاد کی وہ بات جس نے سوچ کا رخ بدل دیا، وہ دوست جس نے برے وقت میں ساتھ نہیں چھوڑا، وہ انجان جس نے ایک بار بے غرض مدد کی۔ یہ سب محفوظ رہنے چاہئیں۔ غلطیوں سے ملنے والے سبق بھی، کیونکہ تجربہ مٹانا نہیں، تکلیف مٹانی ہے۔ واقعہ جانے دینا ہے، سبق یاد رکھنا ہے۔

اپنی ذاتی جدوجہد اور ترقی کی کہانی بھی یاد رکھنا ہے۔ کیسے آپ نے اپنی قابلیت بڑھائی، نئی چیزیں سیکھیں، نئی مہارتیں حاصل کیں اور اپنے آپ کو قابل کیا۔ یہ سب یاد رکھنےو الی باتیں۔ اسی طرح مشکلات کے دوران جہاں آپ نے ہمت کا مظاہرہ کیا، یہ بھی یاد رکھیں، آئندہ کسی دوسری مشکل میں یہ تجربہ کام آئے گا۔

زہریلی یادوں سےبھری الماری کیسےصاف کی جائے؟

سچی بات یہ ہے کہ اس پہلو پر چند ایک باتیں تو میرے ذہن میں تھیں، باقیوں کے لیےخاکسار کو ریسرچ کرنا پڑی۔ دو چار ریسرچ پیپرز بھی پڑھنے پڑے۔ ماہرین چند ایک مشورے دیتے ہیں، انہیں اپنے الفاظ میں آپ تک پہنچا رہا ہوں۔ مجھے تو یہ کام کی باتیں لگی ہیں، آپ ٹرائی کریں، ان شااللہ فائدہ ہوگا۔

معافی کا عمل: معافی سب سے طاقتور ذہنی ڈیلیٹ بٹن ہے۔ یہ نہ صرف دوسروں کو معاف کرنا ہے بلکہ خود کو بھی معاف کرنا ہے۔

عملی طریقہ: ایک خط لکھیں (جو کسی کو بھیجنے کی ضرورت نہیں)۔ اس میں اس ٹاکس شخص کے بارے میں لکھیں یا وہ واقعہ لکھیں جس نے آپ کو تکلیف دی۔ اپنے جذبات پوری شدت سے بیان کریں۔ میں نے تو اس میں اضافہ یہ کیا ہے کہ سرائیکی کی دو چار کلاسیک گالیاں بھی شامل کر دیں۔آہو۔ آپ بھی اپنی مادری زبان سے استفادہ کر سکتے ہیں یا اگر آپ بھلے آدمی ہیں، تنہائی میں بھی مہذب اور نستعلیق رہتے ہیں تو گالی نہ لکھیں، باقی سب کچھ لکھ ڈالیں۔ اس کے بعد خط کو پھاڑ دیں، جلا دیں یا پھاڑ کر کسی گٹر وغیرہ یا سڑک کنارے لگے کوڑے دان میں پھینک دیں۔

ماہرین کے مطابق یہ عمل دماغ سے زہریلے جذبات کو نکال دیتا ہے اور دل کو ہلکا کر دیتا ہے۔ ابتدا میں مشکل لگتا ہے، لیکن اکیس دن یعنی تین ہفتے مسلسل کرنے سے عادت بن جاتی ہے۔

برین ڈمپ جرنلنگ: ذہن میں گھومنے والے تمام خیالات کاغذ پر اتار دینا۔

عملی طریقہ: روزانہ صبح یا رات کو دس سےپندرہ منٹ ایک نوٹ بک میں لکھیں۔ کوئی خاص اصول ضابطہ نہیں۔ دل میں جو بھی آ رہا ہے لکھیں (غصہ، فکر، پریشانی، خواہشات)۔ کسی قسم کا سنسر نہیں، ہر قسم کا منفی خیال لکھ ڈالیں۔ البتہ لکھنے کے بعد منفی خیالات کو الگ کر کے ’ڈیلیٹ‘ یا ’لیٹ گو‘ لکھیں۔ یہ تکنیک تھراپی میں بھی استعمال ہوتی ہے اور ذہن کو صاف کرنے میں بہت موثر ہے۔

اس جرنلنگ میں فور پلرز تھیوری بہت کامیاب رہتی ہے۔ آسان طریقہ ہے۔ جرنل لکھتے ہوئے چار خانے بنا لیں۔ ایک میں کوئی سا بھی منفی خیال لکھیں۔ اس منفی سوچ کے حق میں دلائل لکھیں یعنی وہ مثالیں، واقعات ، شواہد جو اسے درست بناتےہیں۔ تیسرے خانے میں اس کے خلاف دلائل، شوائد وغیرہ دیانت داری سے لکھیں۔ چوتھے میں خود ہی تجزیہ کر کےبیلنس رائےلکھیں۔ اس کی آسان مثال بتاوں ۔ جیسے یہ منفی خیال کہ میں نکما اور نالائق ہوں، مجھ سے کچھ نہیں ہوتا۔ اب اس کے حق میں دلائل لکھیں جیسے یہ کہ فلاں فلاں کام مجھ سےنہیں ہوئے، بڑی شرمندگی ہوئی وغیرہ۔ پھر اس کے خلاف دلائل لکھیں کہ فلاں فلاں کام میں نے کر بھی تو لیا تھا جوسراہا بھی گیا۔ آخر میں بیلنس کر دیں کہ مجھ سےغلطیاں ہوئی ہیں، مگر میں نے کچھ اچھے کام بھی کیے ہیں، میں غلطیوں سےسیکھ کربہتری لاؤں گا۔

مائنڈ فُلنس اور مراقبہ :ذہن کو پریزنٹ موومنٹ یعنی حال میں لانا۔

عملی طریقہ: روزانہ دس منٹ آنکھیں بند کر کے سانس پر توجہ دیں۔

اگر خیال آئے تو اسے دیکھیں اور بغیر جج کیے خیال کو جانے دیں۔ کہتے ہیں خیال بادل کی طرح آئے گا، آپ نےبھی اسےآسمان پر آئے بادل کی طرح دیکھنا ہے اور جانے دینا ہے۔ نئےلوگ یوٹیوب پر سرچ کرسکتے ہیں۔ مائنڈفل نیس تکنیک پر بےشمار ویڈیوز مل جائیں گی۔ ماہرین کےمطابق اس سے پرانی یادیں اور غصہ کنٹرول ہوتا ہے۔

شکر گزاری کی عادت ڈالنا: منفی سوچوں کی جگہ مثبت خیالات بھرنا۔

عملی طریقہ: ہر رات تین ایسی باتیں لکھیں جن کے لیے آپ شکرگزار ہیں (چاہے چھوٹی سی بھی)۔ مثال: ’آج مناسب ہیلدی یعنی صحت مند کھانا ملا‘، ’خاندان کی حمایت ملی‘ وغیرہ۔ تین چار ہفتوں میں دماغ کی سوچ کا رخ بدل جاتا ہے۔

حدود کا تعین: اصطلاح میں اسے باونڈریز سیٹ کرنا کہتے ہیں۔ یعنی زہریلے لوگوں اور باتوں سے خود کو بچانا۔

عملی طریقہ: ان لوگوں کو سوشل میڈیا پر ان فالو کر دیں جن کی پوسٹیں آپ کو بیزار یا پریشان کرتی ہیں۔ (برسبیل تذکرہ بتاتا چلوں کہ میں روزانہ ایک یا دو لوگوں کو ان فالو کر رہا ہوں، غیر ضروری اورغیر منطقی تحریروں سےخود کو محفوظ رکھنا چاہیے۔ ) ’نہیں‘ کہنا بھی سیکھ لیں ،بغیر وضاحت کیے۔ اگر کسی جگہ مجبوری کی وجہ سے ٹاکس لوگوں سے مکمل رابطہ توڑنا ممکن نہ ہو تو کم سے کم رابطہ رکھیں۔

جسمانی سطح پر علاج : آپ شائد یہ پڑھ کر حیران ہوں مگر ماہرین کے مطابق ورزش آپ کے ذہن کو صاف کرتی ہے۔ یہ دماغ میں اینڈورفنز خارج کرتی ہے۔

عملی طریقہ: روزانہ تیس سے پینتیس منٹ تیز واک، یوگا یا ورزش کریں۔

جب غصہ یا اداسی ہو تو فوراً دس پندرہ منٹ کےلئے باہر جا کر واک کریں یا گھر ہی میں جس حد تک ہوسکے، واک کریں۔ اس کا جادو پھر دیکھئے گا۔ اس کے ساتھ سات آٹھ گھنٹے اچھی نیند ضروری ہے۔ نیند کی کمی منفی سوچوں کو بڑھاتی ہے۔غذا: میں میٹھی چیزیں اور جنک فوڈ کم کریں، پانی زیادہ پئیں۔

فزیکل ڈی کلٹرنگ: اپنے آس پاس کا ماحول صاف کرنے سے اندر خود بخود صاف ہوتا ہے۔

عملی طریقہ: پہلے اپنی الماری، میز اور کمرہ صاف کریں۔وہ چیزیں پھینک دیں جو پرانی یادوں سے جڑی ہوں۔ اس کے بعد گھر بھر کی صفائی کر ڈالیں۔ امید واثق ہے کہ جب تھک ہار کر بستر پر گریں گے تو ذہن صاف ہی ملے گا اور نیند کی دیوی فوری مہربان ہوجائے گی۔

ماحول اور عادات تبدیل کریں : منفی لوگوں/مواد سے فاصلہ رکھیں، سوشل میڈیا کو محدود اور مایوسی پھیلانے والے دوستوں سےبھی دور رہیں۔ جن کا کام صرف منفی سوچ دینا اور ہر وقت کڑھتےرہنا ہے، یہ آپ کی مثبت توانائی کھاجاتےہیں، بہتری اسی میں ہے کہ ان سے دور رہیں۔ مثبت کتابیں، پوڈکاسٹس اور لوگوں سے کنیکٹ ہوجائیں۔

ذہنی صحت اورمنفی خیالات سے نجات پانے اور ڈیلیٹ کا بٹن ایکٹو کرنے کے حوالے سے کئی اہم کتابیں لکھی گئی ہیں، بعض تو اردو میں ترجمہ بھی ہوئی ہیں۔ ڈاکٹر ڈیوڈ برنز کی فیلنگ گڈ اے نیو موڈ تھیوری، ایکہارٹ ٹولے کی پاور آف ناؤ، ڈیوڈ ہاکنگز کی لیٹنگ گو، جیمز کلیئرکی اٹامک ہیبٹس (اس کا اردو ترجمہ ہوچکا) وغیرہ اہم ہیں۔ انہیں پڑھ کر مزید باتیں سیکھ لیں۔

پوری گفتگو کا نچوڑ یہ ہے کہ آج ہی ایک کام کریں۔ آنکھیں بند کریں اور ذہن کی الماری کھول کر دیکھیں۔ ایک ایک فائل نکالیں اور سوچیں، کیا یہ رکھنے کے قابل ہے یا اب اسے ختم کر دینا چاہیے؟ جو غصہ، جو کینہ، جو ناخوشگوار یاد آپ کی رات اور دن کھا رہی ہے، اسے رخصت کر دیں۔ احسان یاد رکھیں، سبق یاد رکھیں، محبتیں یاد رکھیں، مگر کینہ اور بغض کو باہر کا دروازہ دکھا دیں۔

اللہ تعالیٰ سے دعا ہے کہ ہمارے دلوں کو اتنا کشادہ کرے کہ ہم معاف کرنا سیکھیں اور دوسروں کو معاف کرتے کرتے خود کو بھی آزاد کر لیں۔

آخری بات یہ یاد رکھیں کہ تبدیلی کل سے نہیں، آج ہی سےآتی ہے۔ آپ بھی آج ہی سے شروع کریں۔ اپنے ذہن کا سٹوریج چیک کریں اور جو بوجھ آپ کو نیچے کھینچ رہا ہے، اسے ڈیلیٹ کر دیں۔